Milani vazhdon të jetë në kërkim të një sulmuesi në merkaton e verës. Dëshira e madhe për të afruar në “San Siro” Aubamejangun duket se është larg plotësimit, dhe tashmë në ambientin e kuqezinjve ka filluar të qarkullojë lajmi i sulmuesit italian të Lacios, Çiro Imobile.
Megjithatë vetë futbollistët e Milanit duket se do të preferonin shumë një kthim të suedezit Zllatan Ibrahimoviç. Diçka të tillë e ka bërë të qartë mbrojtësi i djathtë i kuqezinjve, Andrea Konti, në një prononcim për televizionin e klubit.
“Ibrahimoviç? Do të ishte një ndihmë e madhe me siguri. Është një lojtar i madh dhe këtë nuk ka nevojë ta them unë. Është një kampion që ka fituar çdo gjë”, tha Konti./Panorama Sport
