Trajneri i Juventusit, Massimiliano Allegri, nuk e ka marrë keq humbjen e djeshme ndaj Milanit në “San Siro”, humbja e dytë që bardhezinjtë pësojnë këtë sezon në stadiumin e skuadrave të këtij qyteti. “Unë dua të përgëzoj skuadrën. Ne e bëmë golin (Pjanic), por na e anulluan. Janë gjëra që ndodhin në futboll. Gjithsesi, kjo humbje është thjesht një “rrëzim” që pësojmë gjatë rrugëtimit tonë të gjatë, por do të ringrihemi. Nuk ia vlen të inatosemi dhe të zihemi me të tjerët apo me njëri-tjetrin”, tha Allegri, që e ka lënë pushim skuadrën ditën e sotme, për të rikuperuar fizikisht dhe mendërisht pas humbjes.
Më tej, trajneri i bardhezinjve shpjegon se si protestat e lojtarëve të Milanit bindën gjyqtarin e takimit (Rizzoli) dhe asistentët e tij të ndryshojnë mendje dhe të anullojnë golin që Pjanic realizoi në pjesën e parë. Anësori e la gol, por gjyqtari i portës ndryshoi gjithçka. “Gjyqtari i portës (Massa) mori përsipër vendimin për të anulluar golin edhe pse mendoj se nuk i takonte atij të ndërhynte, pasi gjyqtari pas porte nuk mund të shohë pozicionin jashtë loje. Mjaftoi një protestë e Milanit për të nisur dyshimet dhe të përmbysin atë që ishte vendosur nga gjyqtari. Kjo është një situatë anormale, më vjen keq, por që nuk e ndryshon rrugëtimin tonë”, tha Allegri.
