Prokuroria e Krimeve të Rënda ka dërguar shkresat e para në kuadër të verifikimit të pasurisë ndaj biznesmenit Edmond Bego, i dënuar më parë në Itali për trafik narkotikësh dhe organizatë kriminale. Lajmi raportohet nga Top Channel, ndërsa prokuroria ka një deklaratë zyrtare mbi këtë çështje.
“Burime pranë këtij organi janë shprehur se gjatë ditës së hënë, janë firmosur shkresat që do t’i dërgohen bankave të nivelit të dytë, zyrës së gjendjes civile, Agjensisë së Prokurimeve Publike si dhe disa bashkive dhe njësive administrative në vend. Më konkretisht, shkresa drejtuar zyrës së gjendjes civile kërkon informacion mbi të afërmit e rrethit familjar të Begos. Shkresa drejtuar bankave kërkon informacion mbi llogaritë në emër të Begos, firmës që ai ka hapur dhe të afërmve të tij si dhe transkasionet e ndryshme që mund të jenë kryer. Ndërsa në Agjensinë e Prokurimeve Publike, përveç informacionit, prokuroria pritet të sekuestrojë edhe dokumentacione të ndryshme që kanë të bëjnë me procedurat e ndjekura për tenderat që Bego ka fituar nga fondet publike.
E njëjta skemë pritet të aplikohet edhe për disa bashki në vend, si ajo e Tiranës, Elbasanit dhe Librazhdit, ku dyshohet që Bego mund të ketë fituar tendera nga fondet publike”, raporton Top Channel.
Edmond Bego, miku me 5 emra i Taulant Ballës, ka qenë i dënuar në Itali për trafik droge me plot 21 vite burg. Ndërsa në Shqipëri ai vuajti vetëm 1 vit e gjysëm burg, pasi gjykatat tona ia falën pjesën tjetër të dënimit.
Partia Demokratike, në disa deklarata për shtyp, akuzoi kreun parlamentar të Partisë Socialiste, Taulant Ballën se kishte lidhje me biznesmenin e dënuar për trafik droge dhe se e kishte mbrojtur politikisht atë.
Sipas ligjit, një person i dënuar penalisht për krime në kuadër të organizatës kriminale nuk mund të përfitojë para nga fondet publike.
