Zonat kufitare mes Turqisë dhe Greqisë po pësojnë një dyndje të emigrantëve nga rajoni i Lindjes së Mesme të cilët duan të kalojnë në perëndim.
Situata e raportuar nga mediat greke flet për turma refugjatësh nga Pakistani, Siria, Afganistani, Irani, të cilët janë drejtuar në zonat detare të afërta me Greqinë e pikat tokësore kufitare.
Mbrëmja e së premtes dhe orët e para të mëngjesit të së shtunës kanë parë me qindra refugjatë të drejtohen në autobusë drejt Greqisë. Situata ka qenë tepër e ashpër në pikën kufitare tokësore Kastanies, në Evro të Greqisë ku rreth 3000 refugjatë, të të gjitha moshave, mes tyre dhe fëmijë, që kanë kaluar nga Adrianopolis drejt Kastanies janë bllokuar në zonën neutrale. Mes tyre dhe policisë ka patur përleshje ku refugjatët kanë qëlluar me gurë ndërsa policia është kundërpërgjigjur me gaz lotsjellës.
Kryeministri grek ka zhvilluar një mbledhje urgjente sot në orën lokale 09:00 me ministrat kryesorë të kabinetit qeveritar, ndërsa të Premten, Mitsotakis pati biseda telefonike me Presidentin Francez Emanuel Macron, Kancelaren gjermane Angela Merkel, Presidentin e Këshillit Evropian Charles Michel, Presidenten e Komisionit Evropian Ursula von der Leyen dhe Kryeministrin Bullgar Boyko Borisov.
Në kufi tashmë kanë mbërritur edhe përforcime të ushtrisë greke të cilët kanë mundur të ndalojnë me forcë hyrjen e emigrantëve.
https://www.youtube.com/watch?v=xNxaLBurNfA&feature=emb_title
Segmenti i Adrianopolis drejt Evros mbetet i mbipopulluar nga refugjatët si dhe situata vijon të jetë mjaft e tensionuar në pikën kufitare të Evros. Greqia mund të mbyllë orët në vazhdim të gjitha pikat kufitare me Turqinë, ndërsa kryeministri grek ka deklaruar në “Tëitter” se nuk është Greqia përgjegjëse për situatën në Siri dhe nuk mund të jetë një vend të paguajë pasojat e luftës.
Kjo krizë e cila rrezikon të kthehet në një krizë humanitare ka si shkak vendimin e presidentit Turk Erdogan i cili ditën e djeshme vendosi të hapë kufirin duke lejuar lejohen refugjatët e bllokuar në vend të ikin drejt Perëndimit.
Vendimi i Erdogan erdhi pasi forcat Turke pësuan humbje në Idlib nga forcat Siriane ndërkohë që Greqia, përmes ministrit Dendias, të premten vuri veton ndaj një rezolute të NATO-s e cila parashikonte mbështetje për Turqinë pasi trupat e saj u sulmuan në Idlib të Sirisë. /Opinion.al
