Mijëra besimtarë të islamit janë lutur në Romë, pranë Koloseut, në shenjë proteste për mbylljen e vendeve të tyre të kultit.
Me anë të kësaj lutje, ata i bënë thirrje autoriteteve vendore që të mbrojnë të drejtat e tyre fetare.
Një pjesë e besimtarëve mbanin në duar pankarta, ku shkruhej “Paqe” dhe “Hapni xhamitë”.
Grumbullimi i tyre u organizua nga shoqata “Dhuumcatu Association”, një grup nga Bangladeshi i fokusuar te të drejtat e emigrantëve islamikë.
Drejtuesit e e kësaj organizate bënë me dije se policia ka mbyllur shumë institucione kulti të besimit islam në Romë, duke bërë të mundur privimin e mbi 100 mijë myslimanëve që jetojnë dhe punojnë në Romë nga lutja e tyre në institucionet e besimit islam.
“I kanë vënë kyçin xhamive, duhet të na i hapin përsëri. Nëse nuk e bëjnë këtë, atëherë të paktën të na sigurojnë një vend tjetër ku të lutemi”, tha Mita Aktr, besimtare myslimane.
Xhami të mirëfillta ka pak në Itali, çfarë do të thotë se shumica e mbi 1.6 milionë myslimanëve që jetojnë në këtë vend, ritet e tyre duhet t’i kryejnë në shtëpi apo nëpër qendra kulturore islamike.
Ideja e xhamive të sajuara në garazhe ka shkaktuar goxha debat.
Politikanja e djathtë romane, Giorgia Meloni, e partisë “Vëllezërit e Italisë”, që doli e treta në zgjedhjet vendore të këtij viti, ka apeluar për kontroll më të madh mbi vendet myslimane të kultit, e kërkon po ashtu që lutjet, detyrimisht të këndohen në gjuhën italiane.
