Vetëm pak ditë pasi marinari i famshëm i fotografuar duke puthur një të panjohur pas përfundimit të Luftës së Dytë Botërore ka ndërruar jetë, statuja e realizuar për nder të tyre në Sarasota të Floridas është dëmtuar.
Tek një të pjesë është shkruar me bojë të kuqe “#MeToo” (lëvizja e njohur kundër abuzimit seksual të grave). Sipas policisë dëmi që i është bërë statujës së “dorëzimit të pakushtëzuar” ka arritur në 1 mijë dollarë duke patur parasysh sipërfaqen e madhe që kishte zënë ky grafit.
Nga policia është konfirmuar se grafitet janë fshirë mëngjesin e së martës. Për shumë persona imazhi i marinarit të ndjerë George Mendonsa duke puthur infermieren Greta Zimmer Friedman përfaqëson gëzimin që kanë ndjerë në SHBA një ditë pas dorëzimit të Japonisë dhe fundit të “Luftës së Dytë Botërore”.
Megjithatë vitet e fundit është diskutuar që ky imazh përshkruan një akt seksual, duke qenë se Mendonsa nuk e ka puthur Friedman me pëlqimin e saj. Lëvizja “MeToo” ka nisur një debat sa i përket pëlqimit dhe sulmit seksual. Në vitin 2005 në një intervistë Greta Zimmer Friedman u shpreh se nuk ishte zgjedhja e saj që të puthej, por Mendonsa e kishte ‘mbërthyer’ atë.
Megjithatë asokohe dhe përpara se të ndërronte jetë ajo theksoi se ajo puthje ishte një “veprim i ngazëllyer” dhe “ishte thjesht një mënyrë për të shprehur çlirimin që më fund lufta kishte përfunduar”. Pas vdekjes së saj në vitin 2016, djali i Friedman është shprehur për “New York Times” se nëna e tij nuk e shihte atë puthje në mënyrë negative.
Policia e Sarasotës në Florida kanë ndarë imazhet e statujës së dëmtuar në rrjete sociale duke bërë që shumë persona të shpresin zemërimin e tyre për grafitet dhe idesë që ky mund të quhej një sulm seksual. “Statuja përfaqëson një periudhë kohe, shumica e të cilëve nuk kanë të bëjnë me të. I gjithë vendi po festonte mbarimin e luftës, i gjithë vendi ishte bashkë në këtë festë,”-shkruan një nga komentuesit në foton e statujës së dëmtuar.
“Sulmet seksuale janë të tmerrshme, por kjo nuk ishte aspak një situatë e tillë. Mund t’iu siguroj që ky burrë, i cili gjatë kësaj jave ka ndërruar jetë, nuk ka menduar të sulmojë seksualisht një grua, në çastin që zbuloi se lufta ka mbaruar,”-shkruan një tjetër komentues. Të tjerë janë shprehur se është një akt vandal dhe pa respekt pasi se Mendonsa vetëm pak ditë më parë ka ndërruar jetë. Megjithatë ka patur edhe zëra të cilët i kanë justifikuar grafitet.
“Statuja mund të quhet ‘dorëzimin i pakushtëzuar’, por në fakt rrethana ka qenë ‘dorëzim i pavullnetshëm’. Ajo nuk e njihte djalin, ai thjesht e kapi dhe e puthi,”-shkruan një tjetër komentues. Lëvizja “MeToo” ka gjithashtu për qëllim që të edukojë gratë që të kuptojnë se nuk mund të shihen si objekt seksi që meshkujt kanë të drejtë t’i kenë kur të duan./Xh.K/Opinion.al/
Përshtatur në shqip nga BBC
