Presidenti i Republikës Ilir Meta bëri apel për bashkëpunim mes Kosovës dhe Shqipërisë për të tejkaluar krizat që sipas tij i krijojmë vetes.
Gjatë fjalës së tij ditën e sotme në Prishtinë ku ishte i ftuar në Akademinë Solemne “Faleminderit Shqipëri”, Meta theksoi si sfidë kryesore të dy vendeve braktisjen e vendit nga të rinjtë.
“20 vite kanë kaluar dhe vërtet jemi shumë më mirë nga ç’kemi qenë njëzet vite më parë. Ashtu sikurse duhet të jemi më të vëmendshëm për të ardhmen dhe të shohim se çfarë duhet të bëjmë më mirë për t’u mos u motivuar dhe vënë në lëvizje virtytet tona më të mira kombëtare vetëm në kohë krizash. Duhet të punojmë çdo ditë në mënyrë të përgjegjshme dhe të virtytshme që të evitojmë krizat dhe vështirësitë që i krijojmë vetes. Shqetësim im është se duhet të punojmë më shumë për të mbrojtur të rinjtë në Shqipëri, në Kosovë dhe kudo ku jetojnë shqiptarët në këtë rajon, për të mos braktisur vendin e tyre. Kjo është sfida jonë më e madhe”.
Në këtë mbledhje për të përkujtuar eksodin e shqiptarëve të Kosovës nga regjimi serb, Meta tha se Kosova duhet të vijojë të jetë shembull bashkëpunimi në rajon
“Ky 21-vjetor i kujtimit të atij eksodi biblik, i atyre vuajtjeve biblike, por edhe i lirisë së Kosovës, është njëkohësisht edhe një mundësi që Kosova të tregojë vullnetin e saj për pajtim siç e ka treguar në mënyrë të vazhdueshme gjatë këtyre dy dekadave, për bashkëpunim, gjithmonë në mënyrën më dinjitoze, me të gjithë, duke qenë një shembull në rajonin tonë”.
Kreu i shtetit falenderoi Kosovën për ndihmën e dhënë në përballimin e emergjencës pas tërmetit të 26 Nëntorit që goditi Shqipërinë. /Opinion.al
