Presidenti Ilir Meta ka vijuar takimet në kuadër të vizitës zyrtare në Kosovë, e fundit me detyrën e kreut të shtetit. Ai është pritur nga kryeministri Albin Kurti me të ciln ka diskutuar ndër të tjera dhe për konkretizimin e marrëveshjeve ndërqeveritare të nënshkruara. Sipas Metës, është jetik realizimi i projekteve të përbashkëta si ndërtimi i hekurudhës Durrës-Prishtinë, me impakt në ekonominë e të dy vendeve.
Lidhur me bashkëpunimin rajonal, Meta thotë se me Kurtin ndanë të njëjtin vlerësim në për nismat gjithëpërfshirëse, sikurse Procesi i Berlinit.
“Shumë e përzemërt pritja nga Kryeministri i Kosovës, Albin Kurti, me të cilin pata kënaqësinë të zhvilloja një bisedë tepër të frytshme. Duke vlerësuar marrëdhëniet vëllazërore mes vendeve tona dhe potencialin e jashtëzakonshëm për forcimin e tyre, theksova rëndësinë e konkretizimit efikas të marrëveshjeve ndërqeveritare të nënshkruara. Jetik realizimi i projekteve të përbashkëta që afrojnë edhe më shumë qytetarët tanë, si ndërtimi i hekurudhës Durrës-Prishtinë, me impakt në ekonominë e të dy vendeve dhe të rajonit, që do na bashkojnë më shumë dhe do ndalnin hemoragjinë demografike që na ka prekur.
Nevojitet më shumë koordinim edhe në politikën e jashtme dhe rajonale, në përputhje me qëllimin e përbashkët për anëtarësim në Bashkimin Europian. Lidhur me bashkëpunimin rajonal, ndamë të njëjtin vlerësim në përkrahje vetëm të nismave gjithëpërfshirëse, sikurse Procesi i Berlinit. Kosova është bërë shembull i demokracisë, luftës kundër krimit e korrupsionit, sundimit të ligjit dhe europianizimit në rajon, e vlerësuar edhe nga raportet ndërkombëtare, që meriton sa më parë liberalizimin e vizave për qytetarët e saj”, shkruan Meta.
