Kongresmenin Amerikan Eliot Engel ka zhvilluar një vizitë në Kryesinë e Kuvendit ditën e sotme, ku është takuar me Kreun e Institucionit, Ilir Meta.
Duke biseduar mbi zhvillimet e fundit politike në vend, Kongresmeni Engel vlerësoi progresin e bërë nga Shqipëria dhe në veçanti miratimin e paketës kushtetuese për reformën në drejtësi.
“Meta shprehu mirënjohjen për mbështetjen e fortë të SHBA në forcimin e institucioneve demokratike të Shqipërisë dhe në veçanti për reformën në drejtësi, e cila është kyçe jo vetëm për avancimin e vendit drejt Bashkimit Evropian, por edhe për luftën ndaj korrupsionit, krimit të organizuar, dhe për rritjen e besueshmërisë së investitorëve të huaj si dhe për përmirësimin e klimës së biznesit në Shqipëri. Meta dhe Engel evidentuan rolin konstruktiv të Shqipërisë, dhe në përfundim të takimit ndanë bindjen e përbashkët se miqësia e fortë dhe e natyrshme shqiptaroamerikane është një bazë solide për zhvillimin dhe konkretizimin e partneritetit strategjik mes dy vendeve në të ardhmen”, thuhet në njoftimin për shtyp të Kuvendit.
Në takim ishin edhe Ambasadori i SHBA në Shqipëri Donald Lu dhe aktivisti i njohur i diasporës shqiptare në SHBA, Harry Bajraktari.
