Presidenti Ilir Meta ka vazhduar me akuzat ndaj qeverisë në lidhje me reformën në drejtësi. Në një postim në rrjetet sociale kreu i shtetit shkruan se fajin nuk e ka Reforma e bërë me 140 vota në Kuvend tre vjet më parë, por transformimi i saj në Ramaformë bashkë me një kor të strukturuar ndërkombëtar që nuk do të pranojë bashkëfajësinë për këtë dështim që po e vuajnë qytetarët, ekonomia dhe biznesi.
“Shpresoj që këto “arritje” të Ramaformës të mos i mësojnë Profesorët e nderuar të Komisionit Venecias, të paktën gjatë verës, se më e pakta do kalojnë në gjendje të fikti, përveçse s’do e kuptojnë kurrë pse duhet të punonin e studionin për mëse një vit me intensitet aq të lartë e të vinin e të iknin shumë herë kur këtë Ramaformë mund ta kishte mbyllur z.Agaci për një javë dhe disa miq të inamoruar pas reformës të brohorisnin “È buono per l’Albania”, shkruan Meta.
Në lidhje me akuzat se ai ka frikë nga drejtësia ndaj sulmon reformën, Meta shkruan: E di që disa do thonë se kam frikë nga Reforma në Drejtësi e sidomos nga Spaku. Pa merak për të gjithë sepse sapo kalova edhe Spaçin. Kalofshi bukur sot të gjithë.
Pak ditë më parë Presidenti i Republikës u përfshi në replika direkte me ambasadorin e Delegacionit Europian, Luigi Soreca, i cili u shpreh mbi nevojën e një angazhimi urgjent të forcave politike në dialog.
Ambasadori Soreca theksoi se reforma zgjedhore duhet të rinisë me shpejtësi, ndërsa zbatimi i Reformës në Drejtësi është i pakthyeshëm.
Sipas presidentit Meta zbatimi i Reformës në Drejtësi është devijuar nga kryeministri Edi Rama dhe përsëriti akuzat për qëndrime politike të mbajtura nga Misioni Europian Euralius./ Opinion.al
