Presidenti, Ilir Meta, ka folur sot nga Kruja në lidhje me tubimin e paralajmëruar prej tij, para se vendi të goditej nga tërmeti tragjik, i cili la pas dhjetëra viktima, qindra të plagosur dhe dëme të mëdha materiale.
Meta ka deklaruar se tubimi në mbrojtje të demokracisë i planifikuar më 8 dhjetor do të bëhet kur qytetarët ti kthehen normalitetit.
Deklaratën Meta e bëri pasi vizitoi kalanë e Krujës, e cila pësoi dëmtime nga tërmeti i 26 Nëntorit. Presidenti është futur brenda Kalasë për të parë nga afër dëmet që ajo ka pësuar.
“Përpjekjet konkrete duhet të vazhdojnë me qëllim përmirësimin e kordinimit të të gjitha institucioneve me pushtetin vendor dhe komunitetet e prekura për të arritur zgjidhjet më optimale sa më shpejt të jetë e mundur. Presidenti mbron Kushtetutën çdo vit, por tani është koha për të bërë çdo gjë që vendi të rikthehet në normalitet sa më shpejt dhe kjo do të ndodhë kur të gjithë banorët ti kthehen normalisht jetës së tyre të para 26 nëntorit. Gjendja është shqetësuese për arsye historike, pra ka një histori të lëvizjeve gjeologjike të vetë Krujës por në mënyrë të veçante pas situatës së krijuar pas tërmetit të 26 Nëntorit. Është një monument mjaft i rëndësishëm. Po punohet për të bërë të gjitha vlerësimet në mënyrë që të merren masa për të ruajtur këto vlera që janë edhe krenaria jonë kombëtare”-ka thënë Meta.
Ndërkohë, në një reagim në rrjetet sociale, Meta shkruan se Kulla e Kambanës dhe Teqeja e Dollmës, dy nga monumentet unike dhe mjaft të rëndësishme të Kalasë, kanë pësuar dëmtime shumë të rënda, ndërsa kërkoi marrjen e masave të menjëhershme për riparimin e tyre.
“Vizitova sot Kalanë e Krujës, kurorën e krenarisë së trashëgimisë tonë kombëtare, të dëmtuar nga tërmeti shkatërrimtar i 26 nëntorit.Veçanërisht Kulla e Kambanës dhe Teqeja e Dollmës, dy nga monumentet unike dhe mjaft të rëndësishme të Kalasë, kanë pësuar dëmtime shumë të rënda, për të cilat duhen marrë masa të menjëhershme për t’u riparuar dhe mbrojtur, për vetë simbolikën e fortë kulturore e kombëtare që përfaqësojnë. Puna e nisur duhet të ndiqet me përgjegjësi maksimale deri në fund!”- shkruan Meta./Opinion.al
