Ditën e sotme, Presidenti i Republikës, Ilir Meta, mori pjesë në drekën e Krishtlindjes të shtruar në Famullinë “Zoja e Ngritur në Qiell” për familjet e prekura nga tërmeti në Mamurras.
Në drekën e Krishtlindjes ishte i pranishëm edhe Metropolitan Kryeipeshkvit Metropolitan Tiranë-Durrës, Imzot George Frendo, primari i famullisë Dom Altin Shabani dhe murgeshat që shërbejnë në këtë zonë që prej vitit 1992.
Ndërkohë, Presidenti Meta iu drejtua familjeve të prekura nga tërmeti i 26 nëntorit 2019, duke theksuar se duhet të jemi pranë qytetarëve që kanë nevojë dhe përfshirje sociale.
Teksa theksoi pasojat që la pas tërmeti tragjik, Meta tha se ky është momenti që të punojmë të gjithë së bashku si dhe të kremtojmë Krishtlindjet.
“Në këtë ditë të bekuar të Krishtlindjes, duhet të jemi në radhë të parë më pranë atyre që kanë nevojë për më shumë kujdes, dashuri dhe përfshirje sociale. Këto Krishlindje na gjetën në vështirësi për shkak të pasojave që la tërmeti tragjik i 26 nëntorit dhe ju e ndjetë edhe më fort se sa shumë zona të tjera, dhe për fat të keq patët më shumë dëme e humbje. Megjithatë është një moment për të shpresuar, për të gëzuar, për të punuar të gjithë së bashku në mënyrë që Krishtlindjet e tjera t’i kremtojmë si gjithmonë nën një atmosferë festive dhe gjithëpërfshirëse! Edhe një herë faleminderit Imzot Frendos për ftesën e tij! Ju uroj gëzuar këto Krishtlindje dhe Vitin e Ri! Le të jenë një ogur i mirë për ju si dhe për të gjithë vendin tonë”,-tha Meta/Opinion.al
