Meta letër krerëve të grupeve: Duhet të ndryshojmë ligjin zgjedhor

TIRANË-Kryetari i Kuvendit, Ilir Meta, përmes një letre drejtuar kryetarëve të grupeve parlamentare kërkon nisjen e procesit të reformës zgjedhore. “Duhet të ngrihet komisioni të posaçëm parlamentar”, thekson Meta.

“Bazuar në rekomandimet e raporteve përfundimtare të OSBE/ODIHR për zgjedhjet parlamentare të 2013­s dhe zgjedhjet vendore të vitit 2015, si dhe të praktikës më të mirë parlamentare, në përgatitjen e ndryshimeve në legjislacionin zgjedhor, do të kërkoja nga ju shprehjen e vullnetit për fillimin e këtij procesi në Kuvendin e Shqipërisë”, thuhet në letrën e kryeparlamentarit Meta.

Një proces i kryer në kohë, vijon Meta, është një garanci për realizimin e zgjedhjeve sipas standardeve ndërkombëtare dhe në përputhje me rekomandimet e raporteve të OSBE/ ODIHR­it për zgjedhjet në Shqipëri.

Mes partive politike në vend ka pasur debate sa i takon primit elektoral, ndërsa ngritja e komisionit për reformën zgjedhore do t’i çojë më përpara diskutimet, për të arritur më pas edhe në hapat e tjerë drejt realizimit të reformës.

Pjesë nga letra e Metës

Sipas eksperiencës së mëparshme, ky proces është realizuar nga një Komision i Posaçëm parlamentar, me përfaqësi të shumicës dhe pakicës parlamentare.

Mbi sa më sipër, për të adresuar në kohë rekomandimet e raporteve të sipërcituara të OSBE/ODIHR­, do të vlerësoja që në përfundim të konsultimeve tuaja nëpërmjet grupeve parlamentare që i përkasin, shumicës dhe pakicës, të përcillni kërkesën për projektvendimin e Kuvendit për formalizimin e këtij Komisioni të Posaçëm parlamentar, në të cilin do të përcaktohet objekti, mënyra se si do të ushtrohet veprimtaria e këtij komisioni, si dhe raportet e përfaqësimit në të.

Një vëmendje të veçantë për këtë çështje ka edhe Prezenca e OSBE në Shqipëri, e cila në një takim të posaçëm të ambasadorit të saj z.Raunig me mua si kryetar i Kuvendit, ka theksuar nevojën e fillimit dhe zhvillimit në kohë të këtij procesi.

Në përfundim, vlerësoj se një proces i kryer në kohë është një garanci më shumë për përgatitjen dhe realizimin zgjedhjeve sipas standardeve ndërkombëtare dhe në përputhje me rekomandimet e raporteve të OSBE/ODIHR, për zgjedhjet në Shqipëri.