Ish-kryeministri Sali Berisha, nga dritarja e banesës së tij, ka uruar Ilir Metën dhe anëtarët e konventës së Partisë së Lirisë.
Berisha hodhi akuza ndaj qeverisë duke thënë se ‘shkelmojnë ligjet dhe Kushtetutën për interesat e pasurimit të tyre’.
Ndër të tjera ish-kryeministri tha se sot është koha e guximtarëve dhe luftëtarëve.
“Urimet më të përzemërta presidentit të Partisë së Lirisë, anëtarëve, mbështetësve, drejtuesve të saj për konventën historike, konventën e kthesës, konventën e betejës fitimtare.
Një përshëndetje të përzemërt zonjës së nderuar, atdhetares së flaktë, intelektuales, bashkëpunëtores të ngushtë të presidentit Rugova, zonjës Edita Tahiri.
Një nderim të madh, të veçantë heroit të vërtetë të lirisë dhe dinjitetit njerëzor, Ylli Bodinakut, vepra e të cilit është sot më frymëzuese se kurrë.
Miqtë e mi, Ylli Bodinaku është ai qëndrestar, ai qytetar, ai shqiptar që vendosi në emër të lirisë të niset drejt vdekjes, nën moton o sot o kurrë dhe theu në Tiranë, Murin e Berlinit.
Ylli Bodinaku kur ndërmori aktin e tij nuk kishte mbrapa një parti, kishte idealet e tij dhe kauzën e drejtë për të cilën ai vendosi të sakrifikojë dhe jetën pa marrë parasysh asgjë sepse i tha vetes, ose i lirë dhe me dinjitet, ose i vdekur. Kështu nuk durohet.
Të dashur miq, sot ne përballemi pas 32 vitesh me një diktaturë më të keqe se ajo e vitit 1990.
Me një diktaturë, eksponentët e të cilës vjedhin qytetarët shqiptarë çdo ditë dhe na poshtërojnë.
Eksponentët e të cilës shkelmojnë ligjet dhe Kushtetutën për interesat e pasurimit të tyre.
Drejtues të të cilës, Edi Rama, Erion Veliaj, Taulant Balla janë simbole më të nxira të antishqiptarizmit.
Miqtë e mi, Shqipëria ka qindra mijëra opozitarë për të cilët kam respektin më të madh.
Por çdo opozitar, çdo qytetar i këtij vendi duhet ta ketë të qartë si kristali se koha sot është e luftëtarëve.
Se koha është e guximtarëve.
Se koha është e atyre që marrin vendime si Bodinaku 32 vite më parë.
Se koha është e atyre që vendosin të mbrojnë dinjitetin, me çdo çmim, me çdo kusht”, tha Berisha.
