Presidenti Ilir Meta ka marrë pjesë si i ftuar nderi në Byronë e Asamblesë Parlamentare të OSBE-së në Kopenhagë të Danimarkës. Meta ka mbajtur edhe një fjalim, duke u zotuar për seriozitet dhe përgjegjshmëri të Shqipërisë gjatë kryesimit të OSBE-së në vitin 2020.
Duke folur për situatën në Shqipëri, Meta është shprehur se nuk është i kënaqur me gjendjen politike në vend.
“Do të kisha dashur një gjendje më optimiste politike të vendit tonë, të paraprirë nga një dialog politik i mirëstrukturuar dhe konsensus i përparuar mbi 5 fushat kryesore të reformave. S’e fsheh dot faktin që nuk jam i kënaqur me situatën aktuale, për të cilën shpresoj të marrë një kthesë 180 gradëshe të arsyeshme sa më shpejt të jetë e mundur dhe më mirë herët, sesa më vonë, duke pasur parasysh gjithashtu rolin shumë të rëndësishëm që Shqipëria duhet të luajë në rajonin e Ballkanit Perëndimor, si një faktor vendimtar për të forcuar stabilitetin dhe sigurinë rajonale”, është shprehur Meta.
Ai ka folur edhe për marrëveshjen mes Greqisë dhe Maqedonisë së Veriut, si një rast suksesi në Ballkan, ndërsa ka shtuar se diçka e tillë duhet të ndodhë edhe mes Kosovës dhe Serbisë.
“Ndërsa një dritare tjetër e mundësive rajonale paraqitet nga dialogu Kosovë-Serbi, dua të theksoj se është me rëndësi jetike që të dyja palët përgjegjëse në këtë proces të rifillojnë bisedimet e tyre duke synuar një marrëveshje përfundimtare që të jetë e qëndrueshme dhe e zbatueshme, dhe që të respektojë vlerat dhe parimet europiane, të normalizojë marrëdhëniet e tyre dypalëshe dhe të forcojë paqen, sigurinë dhe stabilitetin në rajonin tonë”, ka thënë Ilir Meta./Opinion.al
