Kryetari i Kuvendit, Ilir Meta ka sqaruar se për çfarë bisedoi dje me Edi Ramën në darkën që u zhvillua në godinën e Kryeministrisë. Duke folur për gazetarët nga Kryesia e Kuvendit, Meta u shpreh se në darkën me Edi Ramën biseduan për reformën në drejtësi.
Meta: Nuk dua të hyj në çështje konkrete dhe në çështje specifike. Rëndësinë e vazhdimit të reformës në drejtësi në mënyrën më kushtetuese, ligjore dhe transparente dhe kjo çështje e domosdoshme dhe së dyti rëndësinë e dialogut për të garantuar standardet më të larta evropiane të zgjedhjeve më 18 qershor dhe kjo kërkon klimë dialogu dhe bashkëpunimi.Negociatat nuk hapen pa u zbatuar në mënyrë korrekte ligji i vettingut dhe pa u realizuar zgjedhjet me standarde të larta në 18 qershor. Të ecim përpara.
Darka e djeshme ka zyrtarizuar koalicionin?
Meta: Të gjithë duhet të punojmë që 18 qershori të japë standardin më të lartë të zgjedhjeve.
Duke komentuar protestën e opozitës, ai tha se dialogu me opozitën është i rëndësishëm për integrimin europian.
“Dialogu me opozitën është kyç për integrimin në BE. Parlamenti në radhë të parë është i opozitës, mazhoranca ka edhe qeverinë. Është e mirëpritur që të çojë përpara kërkesat e saj. Parlamenti pa opozitën nuk ka kuptim. Duhet të rritet besimi i shqiptarëve tek zgjedhjet dhe të përmirësohet klima politike”.
Sa i takon mbledhjes së Kryesisë së LSI në orën 19:00 të pasdites së sotme, Meta tha se ka qenë e programuar dhe se nuk u vendos pas darkës me Kryeministrin.
“Mbledhja ka qenë e planifikuar në vijim të angazhimit të forumeve të LSI-së”.
Opozita e udhëhequr nga Partia Demokratike ka deklaruar se do të bojkotojë punimet e parlamentit për sa kohë përkrahësit e saj të jenë në shesh. Protesta që nisi të Shtunën ka hyrë tashmë në ditën e pestë, ku kërkohet dorëheqja e kryeministrit dhe formimi i një qeverie teknike si garanci për zgjedhje të lira dhe të ndershme.
