Me anë të një statusi në Facebook, Presidenti Ilir Meta ka reaguar edhe njëherë për situatën në vend. Fitoret e thella, shkruan ai duke ironizuar mazhorancën për fitoren që ata shpallën më 30 qershor, penalizojnë të ardhmen e vendit dhe viktimat e tyre shton Meta janë të gjithë qytetarët shqiptarë “pa dallime partiake”.
Presidenti i konsideron zgjedhjet të paligjshme por në të njëjtën kohë kritikon edhe opozitën pasi e quan “mbresëlënës” entuziazmin e liderëve të saj për faktin se ata deklarojnë se fituan 85%. Ai i kujton atyre se sikur të ishin regjistruar në kohë “para shfuqizimit të 30 qershorit si datë e zgjedhjeve do t’i mjaftonte të kishte për vete, jo më shumë se 1/4 e 85% për të arritur një fitore reale dhe institucionale në shumicën dërrmuese të njësive vendore”.
Asgjësimi i pushtetit vendor dhe qendror, vazhdon Meta, i shërben vetëm pakicës dhe kjo gjë sipas tij na i ka hequr të gjitha shanset për çeljen e negociatave me BE por ka rrezik, të na ndëshkojnë “në institucionet aktuale, që merren me mbrojtjen e autonomisëë vendore, demokracisë vendore dhe të drejtat e njeriut”. /Opinion.al
