Pas dështimit të takimit RamaBasha, tashmë çështja e reformës në drejtësi do të ulë bashkë në një tryezë bisedimesh kreun e Kuvendit, Ilir Meta, njëherësh kryetar i LSI, dhe kreun e Partisë Demokratike, Lulzim Basha.
Takimi MetaBasha mësohet se do të zhvillohet pas pak (e diel 12 qershor) në orën 11:00 në ambientet e hotel “Rogner”. Ulja e dy palëve në tryezën e bisedimeve mësohet se ka ardhur pas ndërmjetësimit të eurodeputetit Kukan. Burimet nga PD, kanë konfirmuar për “News24” takimin mes Metës dhe Bashës, duke shtuar se në këtë takim kreu i opozitës do të shoqërohet nga deputeti Oerd Bylykbashi.
Një ditë me parë, Meta tha se i ka dërguar një ftesë zyrtare Lulzim Bashës për një takim në kuadër të reformës në drejtësi. Meta tha se Reforma në Drejtësi duhet të miratohet sipas parimeve të përcaktuara nga Komisioni i Venecias. “Bej me dije se si kryetar i Kuvendit i kam dërguar sot një ftesë dhe kërkesë zyrtare kryetarit të PD Lulzim Basha për t’u takuar me të në çdo kohë, vend dhe në çdo format, por vetëm me një kusht; deri ditën e hënë. Jam i bindur se jemi tashmë të vonuar me kalendarin e reformës për ndryshimet kushtetuese për reformën në drejtësi, që nuk është përfshirë për arsye të mosarritjes së kompromisit përfundimtar në Komisionin e Posaçëm të kësaj reformë”, tha Meta ditën e djeshme gjatë konferencës.
Kreu i Kuvendit tha se jemi në krizë kohore dhe kërkoi reflektim nga të gjitha palët që të arrihet një reformë sipas standardeve të Venecias dhe këshillave të Euralius dhe OPDAT.
