Gjendja e jashtëzakonshme që shkaktoi tërmeti në 26 Nëntor ka bërë që të anulohen të gjitha aktivitetet e parashikuara me rastin e Ditës së Pavarësisë në shenjë solidariteti me viktimat dhe të lënduarit.
Megjithatë kryeministri Rama dhe Presidenti Meta kanë shkuar për pak kohë në Vlorë për të marrë pjesë në një ceremoni të shkurtër të ngritjes së flamurit në shenjë respekti për kombin si dhe për ti dhënë kurajo për të kaluar këtë moment të vështirë.
Në përfundim të ceremonisë, Meta tha se kjo ditë duhet të shërbejë që të gjithë “të angazhohemi për të shëruar plagët e gjithë atyre familjeve që janë dëmtuar” dhe bëri apel që politika të qëndrojë bashkë për çështjet më të rëndësishme.
“Sot nuk është ditë për të festuar por një ditë për të nderuar flamurin kombëtar. Të angazhohemi për të shëruar plagët e gjithë atyre familjeve që janë dëmtuar në një mënyrë të jashtëzakonshme nga ky tërmet dhe të jemi pranë atyre që kanë humbur të afërmit. U goditëm drejtpërdrejtë nga tërmeti.
Politika duhet të jetë gjithmonë bashkë për çështjet më të rëndësishme të vendit tonë por sot në këto rast duhet të jetë dhe jam i bindur që do jetë si asnjëherë tjetër, por duhet të jetë edhe nesër për të përmbushur të gjithë ato që kërkon BE.”, tha Meta. /Opinion.al
