Presidenti Ilir Meta ka folur shpesh në media për takimin që ka patur me kryeministrin Edi Rama, përpara se të anulonte datën e zgjedhjeve ndërsa vendi ndodhej në krizë. Këtë të enjte në emisionin Opinion ai ka treguar detaje, madje dhe se çfarë i thoshte shefi i qeverisë.
“Nuk e kam menduar kurrë sinqerisht, deri në 10 qershor që Edi Rama vërtet e mendonte që të shkonte në zgjedhjeve vendore pa opozitën. Mendoja se ky donte të fitonte kohë, duke i vënë në një situatë të vështirë sa të afronte 30 qershori dhe pastaj ky do të vijë dhe vetë dhe të thoshte ore gjej një datë, ose bëj një përpjekje. Unë kam biseduar disa herë dhe ai më thoshte: kemi kohë. Unë nuk di të gënjej”, tha Meta.
“Nuk mendoj që atij i dhimbset shumë stabiliteti apo destabiliteti. Është i vetmi kryeministër në vend që nuk pranon dhe nuk merr përgjegjësi për asnjë nga krizat”, tha Meta më tej.
Presidenti ka folur dhe për takimet me kreun e PD-së, zotin Basha: “Kam diskutuar dhe qëndrimet e mia kanë qenë të qarta. Ato reagimet e tij kanë qenë dhe janë publike, nuk i heq asnjë presje atyre që kam thënë për opozitën”.
***
Zoti President, çfarë biseduat me z. Rama? A ju dha ai një argument ai për qëndrimin që mbante?
Ilir Meta: Unë dua të them disa gjëra. Unë nuk e kam menduar kurrë sinqerisht deri në 10 qershor apo qoftë edhe një ditë më mbrapa që Edi Rama vërtetë e mendonte që të shkonte në zgjedhje vendore pa opozitën. Mendoja që ky do të fitojë kohë, t’i vërë këto ndoshta në një situatë pak si më të vështirë, duke afruar 30 qershori dhe pastaj ky do të vijë edhe vetë dhe do të thotë të gjejmë një mundësi, të caktojmë një datë dhe pastaj vijnë apo nuk vijnë ata, kjo është punë e tyre. Pra, mendoja që ky do ta bënte një përpjekje sido.
E kishit analizë këtë gjë apo e kishit biseduar?
Ilir Meta: E kisha biseduar disa herë dhe më thoshte kemi kohë. E vërteta kjo është, sepse kemi biseduar disa herë.
Ju thoshte se kemi kohë?
Ilir Meta: Po, më ka thënë kështu. Unë nuk di të gënjej, nëse ti ke ndonjë politikan në Shqipëri që të thotë se Ilir Meta më ka gënjyer, në rregull. Por unë nuk di të gënjej. Më thoshte se kemi kohë.
A e pranonte zoti Rama në bisedat private që vendi ishte në krizë?
Ilir Meta: Ai nuk e pranon edhe sot, thotë që është Europa në krizë, nuk jemi ne. Ne po shkëlqejmë, ne po lulëzojmë…. Ai po ta kishte pranuar këtë gjë dhe po të kishte atë ndjenjë përgjegjësie, që duhet të ketë, jo një Kryeministër, i cili ka shumë përgjegjësi ndaj vendit, por një qytetar normal kurrë nuk do të ishin këto situata.
A kishte frikë nga përplasjet civile Edi Rama? Flas për atë që është shprehur në takimet me ju…
Ilir Meta: Unë nuk e di se nga çfarë kishte frikë ai, por është gjëja më e lehtë kur të tjerët të vijnë e të bëjnë miting para Presidencës unë të iki në Skrapar dhe të mbaj fjalime kundër atyre që bëjnë miting këtu.
Në takimet private a kishte Rama frikë për destabilitet në vend?
Ilir Meta: Unë nuk mendoj tani pas gjithë këtyre zhvillimeve që atij i dhimbset shumë stabiliteti apo destabiliteti i Shqipërisë. Nuk e mendoj, sepse po t’i kishte këto ndjenja të përgjegjshme ai nuk do ta kishte lënë kurrë situatën të vinte deri në këtë pikë. Ai është i vetmi Kryeministër në këto 30 vjet që nuk pranon dhe nuk merr asnjë përgjegjësi për asnjë nga krizat dhe pasojat që ai prodhon.
Sepse ai konsideron krizë artificiale të krijuar nga opozita me ndihmën tuaj…
Ilir Meta: Po, patjetër. Nga opozita, media, armiqtë ndërkombëtarë, të gjithë këta bashkë.
Ndërkohë me zotin Basha a keni biseduar gjatë kësaj kohe?
Ilir Meta: Mendoj se kam diskutuar dhe qëndrimet e mia kanë qenë të qarta për të.
Por ai vetë si reagonte?
Ilir Meta: Reagimet e tij kanë qenë dhe janë publike, unë nuk i heq asnjë presje atyre që kam thënë, edhe për opozitën. Dhe nuk kam pasur qëllim…/ Opinion.al
