Ilir Meta foli në një konferencë të gjatë që mbajti sot për mediat edhe për mosarrestimin e Balilit që e detyroi atë të bënte një kërkesë të pazakontë për mbledhjen e Këshillit të Sigurisë Kombëtare. Meta tha se e vetmja porosi që iu dha gjatë viztës në SHBA ishte për arrestimin e Balilit nga organet ligjzbatuese. Ndërsa i pyetur për marrëdhëniet e tij me Tahirin dhe Policinë e Shtetit, Meta pati një mesazh të gjatë për shefin e Tahirit, Edi Ramën, kur i kujtoi 21 Janarin. “Unë e kam mbrojtur policinë edhe kur u sulmua me armë në bulevard”, tha Meta, duke artikuluar atë që Rama e ka mohuar vazhdimisht se ndaj policisë është qëlluar nga protestuesit më 21 janar kur vdiqën 4 vetë.
Ilir Meta: Lidhur me çështjen e Policisë. Unë kam qenë përkrahës dhe mbështetës i saj gjithmonë. Edhe në momentet kur është sulmuar nga horra dhe banditë me armë në mes të Bulevardit. Ju e dini shumë mirë këtë gjë. Do vazhdoj të jem një përkrahës i Policisë së Shtetit, sepse ajo është kontakti i parë i shtetit që përballet me krimin me paligjshmërinë dhe me garantimin e të drejtave të qytetarit. Ky është qëndrimi im dhe jam i bindur se të gjithë ata që nuk e meritojnë uniformën e shtetit duhet të dënohen. Ky është qëndrimi im për policinë e shtetit”, tha Meta.
Për Klement Balilin…ju besoj keni ndjekur një shqetësim publik të z. Lu lidhur me mosarrestimin e tij. Edhe gjatë vizitës sime në SHBA, ku u prita nga zv/ndihmës sekretari i Shtetit atje, pata një bisedë të shkëlqyer me të dhe më kërkoi të punoja për konsensusin, më tha se i vetmi shqetësim konkret nga agjencitë amerikane, t’i tërheq vëmendjen institucioneve këtu te ne për mosarrestimin e Balilit. Nuk ka vend tjetër, përveç Këshillit të Sigurisë Kombëtare, sipas Kushtetutës, ku mblidhen të gjitha institucionet e vendit, ku mund të diskutojnë çështje të mprehta.
Nëse dikush mendon se kjo nuk është e tillë, unë mendoj që nuk ka drejtë. Ndaj e kam gjykuar këtë mbledhje si rrugën më të mirë, jo për t’u marrë me gjyqe ndaj asnjë institucioni, por për të kuptuar rëndësinë dhe përgjegjshmërinë e institucioneve në funksionimin e tyre, aq më tepër kur tani, pas 20 janarit, kemi një partner të ri, SHBA-të.
