Në një rast të paprecendent, 5 fëmijë të mitur, të moshës 10-11 vjeç u shfaqën në transmetim ‘live’ në studion e News 24 mesditën e së enjtes.
Ata pohuan në TV se ishin nisur pa lejen e prindërve nga Cërriku në Tiranë me taksi, për të denoncuar mësuesen e tyre që i dhunon.
News 24 futi në transmetim me zë dhe me figurë 5 të mitur pa asnjë leje nga prindi/mësuesi/kujdestari. Dhe jo vetëm kaq. Fëmijët dyshohet se ishin nxitur nga mësuesja e tyre kujdestare për të kryer këtë veprim. I dënueshëm nuk është denoncimi i dhunës nga nxënësit, por mënyrë se si u krye ky denoncim.
Pas denoncimit në studio fëmijët janë shoqëruar në komisariatin e policisë Elbasan për tu marrë në pyetje. Aty është mësuar se fëmijët kanë qënë të shoqëruar nga mësuesja e tyre kujdestare, edhe pse nuk e pohuan në TV këtë fakt.
Sot, një ditë pas ngjarjes, mësuesja Mjaftoni Ago, 57 vjeçe, banuese në Cërrik , me detyrë mësuese në shkollën 9 vjeçare “7 Marsi” u arrestua.
Prindërit kanë bërë denoncim ndaj Agos, pasi pa lejen e tyre ka përdorur fëmijët për të sulmuar mësueset e tjera të kësaj shkolle.
Mjaftoni Ago, mësuese kujdestare e klasës së 5 A në shkollën 9 vjeçare “7 Marsi” Cërrik, dyshohet se ka shpërdoruar detyrën duke nxitur nxënësit e klasës së saj të shkonin për tu ankuar pranë studios së News 24 për problemet me mësuesit e kësaj shkolle.
Ajo akuzohet për veprën penale “Shpërdorimi i detyrës”, ndërsa në ngarkim të saj materialet i kaluan Prokurorisë së Elbasanit.
Sakaq janë shkarkuar drejtoresha e shkollës si dhe mësuesja tjetër që u denoncua për dhunë nga fëmijët. Specialistë të MAS ndërkohë janë nisur drejt kësaj shkolle dhe pritet të dalin me një raport. /Opinion.al
