Edi Rama dhe Lulzim Basha u ulën sot për herë të parë në një tryezë, ballë për ballë me negociimin e Bujar Nishanit. Takimi i parë mes tyre, 3 muaj nga kriza politike në vend nuk prodhoi marrëveshje, por ama palët i lanë vend njeri-tjetrit për të diskutuar sërish.
Takimi në Presidencë zgjati 3 orë (10:00-13:00). Kryeministri doli në përfundim të takimit, ndërsa Basha qendroi aty edhe për një orë tjetër. Burimet thanë se gjatë kësaj kohe Basha ka folur në telefon me kreun e PPE, Josef Daul. Kujtojmë se Daul është i angazhuar prej ditësh për të ndihmuar PD-në të gjejë konsensusin me mazhorancën për të hyrë në zgjedhje.
Sakaq televizioni Klan ka arritur të mësojë disa detaje nga takimi ku ishin të pranishëm, Rama, Basha, Nishani, Paloka, Ruçi dhe këshilltari i Nishanit.
Qeveria teknike dhe shtyrja e zgjedhjeve janë dy çështjet që ka ngritur Basha porsa ka nisur takimi. Rama mësohet se nuk ka pranuar asnjërën prej tyre. Burimet thanë se Rama madje nuk i ka ofruar as 4 ministrat që ishin pjesë e marrëveshjes së ndërkombëtareve.
Rama mësohet se është shprehur se nuk ka kohë për ndryshime në qeveri dhe se zgjedhjet duhen mbajtur më 18 Qershor.
Por nga ana tjetër, Rama ka bërë një propozim tjetër që artikulohet për herë të parë. Mësohet se ai i ka propozuar Bashës që PD dhe PS të bëjnë bashkërisht disa ndërhyrje në Kushtetutë. Këto sanksione që ka parashtruar Rama kanë të bëjnë me përmirësimin e zgjedhjeve të ardhshme. Këtë Basha nuk e ka pranuar.
Por gjithsesi e rëndësishme është se rruga e dialogut do të mbetet e hapur, këtë e la të nënkuptuar edhe Presidenti në njoftimin zyrtar për mediat: “Gjatë takimit palët prezantuan pikëpamjet e tyre mbi krizën politike dhe rrugët e zgjidhjes së saj. Presidenti vijon të mbajë kontaktet me palët për gjetjen e një zgjidhjeje të mundshme mbi bazë kompromisi”, tha Nishani.
/Opinion.al
