Presidenti amerikan në detyrë Barack Obama është nisur për në Athinë në turneun e tij të fundit si President i Shteteve të Bashkuara, ose ndryshe në udhëtimin e lamtumirës.
Mediat amerikane shkruajnë se qëllimi kryesor i vizitës është të sigurojë aleatët se Presidenti i zgjedhur Donald Trump do të ruajë të njëjtën linjë strategjike në marrëdhëniet BE-SHBA. Ai ka deklaruar më herët se nuk ka vend për shqetësime dhe as për frikë pas fitores së republikanëve.
Shumë zyrtarë europianë kanë dalë me deklarata përfshirë Presidentin e Komisionit Europian, Jean Claude Juncker dhe shefin e NATO-s, Stoltenberg, të cilët janë shprehur se përzgjedhja e Trump kërcënon marrëdhëniet e Brukselit dhe aleatëve me Uashingtonin.
Ditën e hënë, Bashkimi Europian ra dakord për të hartuar një plan të ri mbrojtjeje për të dërguar forca të shpejta jashtë kufijve të unionit, një lëvizje që shihet se i jep mundësinë bllokut të veprojë pa ndihmën e Shteteve të Bashkuara nëse është e nevojshme.
Obama viziton Greqinë, më pas Gjermaninë dhe ne fund Perunë. Ai do të takohet me zyrtarë të lartë përfaqësues të këtyre vendeve, përfshirë edhe kancelaren Angela Merkel.
