Këto janë pamjet e arrestimit të Mamica Kurteshit, Astrit Deliut dhe Guxim Degës, të identifikuar nga policia si shitësit kryesorë të drogës në kryeqytet, me të paktën 10 vite aktivitet.
Këta 3 shtetas që i shihni dhe në këto foto, janë mes 67 të prangosurit nga policia e Tiranës në kuadër të operacionit Tempulli 2.
Aktiviteti kriminal i këtyre 3 trafikantëve është evidentuar dhe më parë nga ana e policisë, por nuk ishte arritur të dokumentohej. Zonat ku këta individë kishin banesën e tyre, e cila ishte kthyer dhe në një bazë për mbajtjen e drogave të forta kryesisht kokainë dhe heroinë, e bënte thuajse të pamundur depërtimin e policisë.
Në këto kushte burime pranë uniformave blu bëjnë me dije se nga ana e agjentëve të antidrogës është vepruar me blerje të stimuluar. Pas arrestimit të tyre policia u gjeti rreth 1 kg kokainë e pastër, si dhe qindra doza heroine.
Lënda narkotike e siguruar nga këta trafikantë sipas policisë dyshohet se është blerë në qytetin e Durrësit, për t’u tregtuar më pas në Tiranë, kryesisht në lokalet e natës. Gjatë operacionit tempulli 2 në të gjithë vendin u arrestuan 273 persona.
Tv Klan
