Kancelari i Gjermanisë, Friedrich Merz ka reaguar pas armëpushimit të arritur mes Izraelit dhe Iranit, duke e cilësuar si një zhvillim shumë të rëndësishëm për stabilitetin në Lindjen e Mesme.
Përmes një postimi në platformën X, Merz u bëri thirrje të dyja palëve të përfshira në konflikt që të respektojnë marrëveshjen dhe të përmbahen nga çdo veprim që mund të rrezikojë këtë moment të brishtë paqeje.
“Nëse ky armëpushim konkretizohet dhe respektohet pas goditjeve vendimtare ushtarake të SHBA-ve ndaj infrastrukturës bërthamore të Iranit, atëherë do të përbëjë një zhvillim shumë pozitiv për rajonin dhe për sigurinë ndërkombëtare.
Suksesi i kësaj marrëveshjeje do ta bëjë Lindjen e Mesme dhe gjithë botën më të sigurt,” tha ai.
Merz gjithashtu bëri të ditur se ai dhe liderët evropianë do të diskutojnë hapat e ardhshëm për ruajtjen e stabilitetit rajonal në kuadër të samitit të NATO-s që zhvillohet sot në Hagë.
Kujtojmë se marrëveshja për armëpushim, e ndërmjetësuar nga Presidenti amerikan Donald Trump, vjen pas një përshkallëzimi të rrezikshëm të tensioneve, që kulmuan me sulmet ajrore amerikane mbi objektet bërthamore iraniane.
