Një mjek dhe tekniku i shërbimit të imazherisë në QSUT kanë rënë në prangat e policisë si rrjedhoje e operacionit policor të koduar “Skaneri”.
Sipas policisë, mjeku dhe tekniku i imazherisë u kanë marrë para pacientëve, për të shmangur procedurën standarde spitalore, për bërjen e skanerit.
Të arrestuarit janë Nazmi Metaliu, 63 vjeç, banues në Tiranë, me profesion mjek dhe, Astrit Mansaku 51 vjeç, banues në Tiranë, me profesion teknik imazherie.
“Specialistët e Seksionit për Hetimin e Krimeve Ekonomike dhe Financiare të DVP Tiranë, si rezultat i një hetimi disamujor, të ndjekur me metoda proaktive, në bashkëpunim me Prokurorinë pranë Gjykatës së Rrethit Gjyqësor Tiranë, me qëllim konstatimin e rasteve të korrupsionit dhe nxjerrjen përpara përgjegjësisë penale, të autorëve të tyre, organizuan dhe finalizuan operacionin policor të koduar “Skaneri”-njofton policia.
Nga veprimet hetimore, ka rezultuar se mjeku dhe imazheristi, në bashkëpunim me njëri-tjetrin, gjatë ushtrimit të detyrës, iu mundësonin qytetarëve të ndryshëm, kundrejt shumave monetare, bërjen e skanerit, në kundërshtim me rregulloren e Spitalit, për kryerjen e kësaj procedure.
Materialet procedurale i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme.
