Dy administratorë të një kompanie që merrte gurë dekorativë nga mali i Tomorrit, janë vënë nën hetim pasi mbetjet e subjekteve të tyre ndotnin ujërat e lumit Osum.
Nën hetim u vunë administratorët A. Gj., 55 vjeç, banues në Fier dhe D. Q., 45 vjeç, banues në Poliçan.
Gjatë kontrolleve të bëra, rezultoi se në subjektin që adminsitrohej nga 55 vjeçari A.Gj, kishte tre punonjës të pasiguruar.
“Si rezultat i kontrolleve gjatë ditës dhe natës, që po kryhen me intesitet të shtuar gjatë kësaj periudhe, në të gjithë territorin e qarkut Berat, për të parandaluar dhe evidentuar krimet kundër mjedisit, specialistët e Seksionit për Hetimin e Krimeve të Stacionit e Policisë Poliçan goditën 2 raste në këtë fushë.
Në vijim të veprimeve procedurale u referuan materialet në Prokurori, ku nisi procedimi penal për shtetasit A. Gj., 55 vjeç, banues në Fier dhe D. Q., 45 vjeç, banues në Poliçan, administratorë subjektesh për nxjerrjen dhe përpunimin e gurëve dekorativë.
Nga kontrollet dhe verifikimet rezultoi se për llogari të subjekteve që administronin 2 shtetasit, merreshin në mënyrë të kundërligjshme, gurë dekorativë nga mali i Tomorrit, si dhe nga mbetjet e subjekteve të tyre, ndoteshin ujërat e lumit Osum. Më tej rezultoi se në subjektin që administronte 55-vjeçari, ishin punësuar pa u siguruar, 3 shtetas.
Në cilësinë e provës materiale u sekuestrua një sasi gurësh dekorativë që u gjetën në subjektet që administroheshin nga shtetasit A. Gj dhe D. Q., gurë të cilët dyshohet se janë përfituar ilegalisht”, njofton policia./Opinion.al
