Partizani është i vendosur të ndërtojë një sulm të frikshëm për pjesën e dytë të sezonit, në mënyrë që titulli kampion të kthehet pas 24 viteve te “demat e kuq”. Në merkaton e dimrit, klubi kryeqytetas do të afrojë lojtarë që të rrisin cilësinë në ekip, por edhe të bëjnë diferencën me rivalët kryesorë.
Të kuqtë kanë prodhuar lojë në dy pjesët e para të sezonit aktual, por shpërdorimi i rasteve para portës së kundërshtarit ka bërë që skuadra e Starovës të lërë pikë rrugës. Për të përmirësuar këtë sektor, të kuqtë pritet që të afrojnë një sulmues të kombëtares së Serbisë, i cili në gjashtë muajt e fundit është aktivizuar me Partizanin e Beogradit.
Nikola Durdiç pritet të jetë goditja e “demave” në merkaton e dimrit. Mësohet se akordi me lojtarin është arritur dhe ai parashikohet të zyrtarizohet para ardhjes së Vitit të Ri 2017. Durdiç është i datëlindjes 1 prill 1986 dhe hapat e parë të karrierës i ka nisur në vendlindje e më pas ka luajtur në Norvegji me skuadrën Haugesund, në Suedi në radhët e Malmos, si dhe për disa sezone ka luajtur në Gjermani në Bundesligën e parë e të dytë, me Grojter Fyrthin, Augsburgun dhe Fortuna Dyseldorfin. Ndërsa në verë të 2016- ës, 30-vjeçari u bë pjesë e Partizanit të Beogradit, ku u shënoi një gol në 13 ndeshje.
Durdiç ka qenë pjesë e ekipeve kombëtare serbe, ku me U-21 ka zhvilluar pesë ndeshje dhe ka shënuar një gol. Ndërsa me skuadrën e parë ai ka zhvilluar një takim, në miqësoren e 6 shkurtit 2013 ndaj Qipros. Në këtë periudhë, kombëtarja serbe drejtohej nga trajneri Sinisha Mihajloviç.
Sulmuesi serb e ka treguar veten edhe në Kupat e Europës, ku me fanellën e Helsingborgut ka arritur të shënojë në Ligën e Europës ndaj Tuentes dhe Hanoverit, ndërsa në 2015-ën, kur bënte pjesë te suedezët e Malmos, ka shënuar në portën e Salzburgut në raundin e tretë paraeliminator të Champions-it.
Divorci me Partizanin e Beogradit
Në prag të festave të fundvitit, Partizani i Beogradit ka nxjerrë në treg kalendarin e 2017-ës që shoqërohet me foto të futbollistëve. Në këtë kalendar bën pjesë edhe sulmuesi Durdiç, por drejtuesit e klubit e kanë specifikuar se 30-vjeçari nuk do të jetë pjesë e skuadrës së tyre në 2017-ën. Drejtori sportiv i Partizanit të Beogradit, Iliev, ka bërë të ditur për mediat serbe se Durdiç nuk do të jetë më pjesë e Partizanit të Beogradit, si dhe ka pohuar se sulmuesi po shikon për transferimin në një klub tjetër.
