Sekretarja e Shkencave Sociale është vënë në pranga pasi akuzohet për “shpërdorim detyre”. Arrestimi është bërë në Rinas në momentin që sekretarja Majlinda Tafaj ishte duke ikur jashtë vendit.
Burime nga policia thanë se, është bërë ndalimi i një Majlinda Tafaj dhe shpallja në kërkim e një shtetasi për veprën penale “Shpërdorimi i detyrës” kryer në bashkëpunim dhe “Korrupsioni pasiv në sektorin privat”.
Gjatë ditës së sotme është vënë në pranga Majlinda Tafaj, 40 vjeçe, banuese në Tiranë, me profesion sekretare pranë Fakultetit të Shkencave Sociale Tiranë
Ndalimi i kësaj shtetaseje është bërë pasi në datë 10.05.2016 në emisionin investigativ “Stop” në Tv Klan janë transmetuar pamje filmike (audio-video) të regjistruar në ambientet e qendrës ”International Studies Insitute” në Tiranë ku një grua që nuk ka fare njohuri në gjuhën Angleze, nëpërmjet ndihmës së asistenteve dhe pedagogëve kundrejt pagesës, realizon testin dhe në fund siguron certifikatën e njohjes së gjuhës Angleze që përdoret si kriter pranimi në programet e studimit të ciklit të dytë dhe të tretë në institucionet për arsimin e lartë.
Rezulton, se personat e përfshirë në veprime të jashtëligjshme, korruptive janë shtetasit:
– L. M” me detyrë administrator i qendrës “Esol Examinations BULATS”
– Majlinda Tafaj me detyrë sekretare mësimore në Fakultetin e Shkencave Sociale Tiranë.
Më datë 12 maj 2016 Majlinda Tafaj është kapur në flagrancë në Pikën e Kalimit Kufitar Rinas në përpjekje për tu larguar jashtë vendit dhe ka vetëdeklaruar se ka bashkëpunuar me shtetasi L. M. dhe ka marrë prej tij vlera monetare (Euro) si shpërblim, përfitim personal për studentë që i ka rekomanduar dhe janë pajisur me certifikatë të “Esol Examinations BULATS”.
Po punohet për identifikimin e bashkëpunëtorëve të tjerë të përfshirë në këtë veprimtari kriminale.
Materialet procedurale janë referuar në Prokurorinë e Rrethit Gjyqësor Tiranë për veprat penale “Shpërdorimi i detyrës” kryer në bashkëpunim dhe “Korrupsioni pasiv në sektorin privat”.
