Kandidati për kryetar për Komunën e Strugës, Mendi Qyra, ka arritur një fitore domethënëse në raundin e parë të zgjedhjeve lokale, duke marrë mbi 50% të votave dhe duke siguruar kështu fitoren, pa pasur nevojë për balotazh.
Gjatë fushatës, Qyra ka arritur të fitojë mbështetje të gjerë edhe tek elektorati gri, cka duket se ka qenë një ndër arsyet kryesore që i mundësoi fitoren në raundin e parë, pavarësisht garës së fortë me figura të njohura të politikës strugane.
Mendi Qyra është një emër i njohur në jetën ekonomike të Strugës dhe më gjerë. Ai ka ndërtuar karrierën e tij si biznesmen dhe ekonomist, duke qenë themelues dhe drejtues i kompanisë “Trim & Lum”, një prej ndërmarrjeve më aktive në rajon. Për disa vite ka drejtuar Dhomën Ekonomike të Veri-Perëndimit të Maqedonisë, ku ka luajtur një rol të rëndësishëm në nxitjen e bashkëpunimit mes sektorit privat dhe institucioneve publike. Qyra ka përfunduar studimet pasuniversitare në ekonomi dhe bujqësi në Universitetin e Zagrebit dhe ka qenë i angazhuar në zhvillimin e projekteve të turizmit lokal, përfshirë menaxhimin e hotelit “Izgrev” dhe angazhimin në sektorin e sigurimeve.
Gjatë fushatës elektorale, Qyra theksoi se nuk hynte në garë për të luftuar askënd, por për të ndërtuar një Strugë më të zhvilluar, më të pastër dhe më të drejtë për të gjithë
Rasti i Mendi Qyrës është një ndër të rrallat, kur një kandidat i pavarur arrin të fitojë në raundin e parë përballë strukturave të konsoliduara partiake.
