Princi Harry dhe Meghan Markle i thanë “PO” njëri-tjetrit mesditën e 19 majit. Pas dasmës, ata bënë daljen e tyre të parë publike si burrë dhe grua. Duka dhe Dukesha e Sussex, u shfaqën në festimet e 70-vjetorit të Princi Charles, dhe dukeshin aq të dashuruar me njëri-tjetrin. Deri këtu çdo gjë duket në rregull, mirëpo një gjë po i shqetëson njerëzit; përse nuk po nisen çifti i sapomartuar për në muajin e mjaltit? Sipas ekspertes së familjes mbretërore, Katie Nicholl, Harry dhe Meghan mund ta shtyjnë muajin e mjaltit, për të udhëtuar drej Meksikos, për të vizituar babanë e Meghan.
“Kam dëgjuar që një nga gjërat që duan të bëjnë së shpejti është të shkojnë dhe të shohin Thomas Markle, pas operacionit që ka bërë në zemër”,-është shprehur Nicholl për Entertainment Tonight.
Ajo ka treguar se Harry është shumë entuziast për ta njohur babanë e Meghan. Nga ana tjetër Dukesha, ka qenë gjatë gjithë kohës e interesuar për shëndetin e të atit.
Babai i Meghan nuk mori pjesë në dasmën mbretërore, pasi kryeu një ndërhyrje në zemër, si pasojë e një ataku në zemër, që kishte kaluar disa ditë përpara ceremonisë. Meghan hyri në histori, si e vetmja nuse që eci vetëm deri tek dera e kishës, ku e priste Princi Charles. Sa i përket muajit të mjaltit, çifti nuk kanë treguar ende destinacionin e tyre, por dyshohet se ata kanë zgjedhur Afrikën.
