Drejtori i Policisë së Shtetit, Muhamet Rrumbullaku, në një konferencë për mediat ka dhënë detaje lidhur me megaoperacionin e koduar “Kurrë mos harro”. Si rrjedhojë e këtij operacioni u zbardhën 6 vrasje, 5 shpërthime me eksploziv; 3 vjedhje me dhunë; 3 tentativë raste për kryerje vrasje; 1 rast kanosje polici.
Konkretisht për një nga vrasjet e zbardhura, atë të Çajup Selimit në Tepelenë në qershor 2021, Rrumbullaku bëri me dije se autorët e dyshuar janë: Laert Haxhiu, 31 vjeç, lindur në Lushnjë; Artan (Marjus) Tafani, 39 vjeç, lindur në Lushnjë; Erisiano Abedini, 32 vjeç, banues në Tepelenë; Lulzim Spahija (Arapi), 28 vjeç, lindur në Lushnjë; Ligor Romacka, 31 vjeç, lindur në Korçë; Bujar Abedini, 49 vjeç, banues në Tepelenë.
Si ndodhi vrasja e biznesmenit?
Çajup Selimi, ndodhej në banesën e tij në një pallat në lagjen “15 shtatori” në Tepelenë kur është thirrur nga një person për të zbritur poshtë.
Në këtë moment 52-vjeçari ka dalë nga banesa për të shkuar poshtë, por një person tjetër po e priste me armë në katin e dytë, duke e qëlluar 2 herë me pistoletë, ku një prej plumbave e ka kapur në zemër duke rezultuar fatal për të. Më pas autorët janë larguar nga vendi i ngjarjes.
Selimi ishte pronar i një biznesi në qytet.
