Kryetari i Partisë Republikane, Fatmir Mediu ka reaguar pas bojkotit të katër anëtarëve të shumicës duke dështuar mbledhjen e sotme KQZ-së, të cilën e kërkoi partia e tij, LSI-ja dhe PAA-ja për të filluar procesin e përgatitjes për zgjedhjet lokale sipas dekretit të Metës në 13 Tetor.
Mediu thotë se PS-ja me mos pjesëmarrjen në KQZ ka bojkotuar zgjedhjet dhe institucionet dhe kjo sipas tij mjafton që Kuvendi të mblidhet dhe të shkarkojë katër anëtarët.
“Çdo gjë ka marë fund, s’ka kushtetute, s’ka shtet, s’ka Institucione, jetojmë ne Republike bananesh. Partia Socialiste me mospjesëmarrjen e saj ne KQZ ka bojkotuar zgjedhjet dhe Institucionet. Mosparaqitja e anëtarëve të KQZ në mbledhjen e sotme është precedenti më i rëndë qe nga krijimi i këtij institucioni. Ata sot jo vetëm i kanë rënë ndesh Dekretit të Presidentit në fuqi dhe s’kanë respektuar detyrimin e tyre kushtetues dhe ligjor për të organizuar zgjedhje, por kane thyer edhe betimin e bërë para Kuvendit kur kane marrë detyrën. Ky është shkak për shkarkimin e tyre të menjëhershëm. Kuvendi duhet të mblidhet menjëherë e të marrë masa”, ka thënë Mediu.
E thirrur për t’u mbajtur në orën 10:00 të kësaj të shtune për të marrë në shqyrtim kërkesën e bërë nga tre parti opozitare për nisjen e procedurave për zgjedhjet lokale në 13 Tetor, mbledhja e Komisionit Qëndror të Zgjedhjeve dështoi. I vetmi që u paraqit në mbledhje ishte kryetari i KQZ-së Klement Zguri.
“Pa kuorum nuk mund të hapet mbledhja. Kolegët kanë deklaruar se janë me leje dhe nuk janë. Ju kërkoj ndjesë, nëse do të kemi mbledhje tjetër është e papërcaktuar deri tani”, tha Zguri.
Në letrën drejtuar KQZ-së, tre partitë opozitare, ajo Republikane, Agrare dhe LSI duke e konsideruar të paligjshëm 30 Qershorin, theksojnë se data e re e caktuar me dekret për zhvillimin e vendoreve është 13 Tetori, ndaj në bazë të Kodit Elektoral, Komisioni duhet të fillojë përgatitjet për organizimin dhe mbarëvajtjen e procesit.
Por mazhoranca e cilëson 13 Tetorin si një ditë të zakonshme pushimi, pasi sipas saj zgjedhjet vendore u mbajtën në 30 Qershor./ Opinion.al
