Shqipëria fitoi medaljen e parë në historinë e Lojërave Olimpike. Mundësi Chermen Valiev, që përfaqësoi flamurin kuqezi në “Paris 2024”, ia doli të fitojë medaljen e bronztë, në kategorinë 74 kg.
Për këtë sukses ka reaguar në rrjetet sociale dhe kryeministri Edi Rama. Kreu i qeverisë vlerëson Valiev dhe shprehet krenar për medaljen e fituar nga mundësi.
Në postimin e tij, Rama thotë se suksesi në në këtë sport erdhi dhe si rezultat i Komitetit të Rilindur Olimpik Shqiptar nën drejtimin e Fidel Yllit.
Postimi i Ramës
Medalja e Parë Olimpike në historinë tonë është një lajm që flet shumë për punën e Komitetit të Rilindur Olimpik Shqiptar nën drejtimin e Fidel Yllit; për të vërtetën që Shqipërisë jo nuk i ikin më talentet sportive të lindura këtu, po talente të lindura gjetkë e zgjedhin si atdheun e dytë për t’u stërvitur në kushte optimale e për t’u ngjitur në majat e botës me flamurin kuqezi; si edhe për fillimin e një historie të re, që në vite do të sjellë fryte të tjera të gëzueshme falë lëvizjes masive sportive për fëmijët dhe investimeve masive në palestra e në infrastrukturë sportive që do të vazhdojnë.
FALEMINDERIT KAMPION
