“Stop” ndodhet në njësinë numër 10, në rrugën e Kavajës pasi zonja Anxhelina Vezuli tregon, se ka një banesë private që në vitin 1960, pranë së cilës është ndërtuar një pallat 7 katësh pa ashensor në vitin ‘97. Por prej një jave, në pallatin pranë saj, ka nisur ndërtimi i një ashensori nga jashtë, duke i ngushtuar komplet hapësirën para banesës.
“Quhen Anxhelina Vezuli banoj prej viti 1960 këtu me certifikatë pronësie. Ju kemi thirrur për të na ndihmuar sepse karshi portës po ndërtohet një ashensor që nuk e kuptoj se si mund të ndodhë kjo gjë. Shtëpia është ndërtuar në vitin 1960 kurse pallati është ndërtuar në vitin 1997, pa ashensor,” tha denoncuesja.
Leja për ashensorin është miratuar nga drejtoresha e bashkisë Tiranë, Anisa Lila, por nuk janë verifikuar kushtet e zbatimit të lejes. Anxhelina tregon se ka shkuar në IMT dhe pas verifikimit, mësoi se me lejen e ashensorit është abuzuar sepse projekti i paraqitur në bashki, përmban ashensor brenda ambienteve të pallatit.
“U interesuam tek IMT, bëmë një kërkesë. Në projektin e zbatimit u pa që ishte një shkelje sepse ashensori duhej që të ndërtohej brenda pallatit dhe jo jashtë pallatit. IMT vërtetoi që ky ashensor është i jashtëligjshëm. Unë nesër-pasnesër mund të vdes, as barrela as xhenazja nuk mbahet. Shtëpia jonë është e vjetër dhe ne duan ta rinovojmë, do të fusim karrocën me rërë. Ku ta fus karrocën me rërë unë, ku fus tullat ose diçka që unë do të bëj rregullim në shtëpi?! Ose do ta shes shtëpinë, kush ma ble mua shtëpinë ku unë kam këto kushte ku ai s’ka ku të fusë një karrocë me rërë apo një makinë me rërë. Unë e kuptoj edhe për banorët, më vjen keq që duan ashensor, por ata kur e kanë blerë shtëpinë e kanë pasur parasysh që pallati ka qenë pa ashensor, po të duan le ta bëjnë brenda pallatit. Kërkojmë nga emisioni “Stop” që të na ndihmojë”, shtoi denoncuesja.
Pas zonjës, në IMT shkon gazetarja e “Stop” dhe drejtori tha se subjektit të ashensorit iu vu gjobë e iu la kohë për ta prishur strukturën e ashensorit brenda 10 ditësh. Në të kundërt, ashensori do të prishet nga IMT.
“Pranë institucionit tonë është paraqitur zonja Anxhelina Vezuli e cila ka depozituar një kërkesë-ankesë, ku pretendon se po ndërtohet një ashensor pranë një objekti ekzistues, i cili ka shkelur kushtet teknike, ka bërë të pamundur lëvizjen e qytetarëve. Nga verifikimi i inspektorëve kemi konstatuar që subjekti nuk ka zbatuar projektin e miratuar sipas deklaratës paraprake. Pra projekti e ka parashikuar ndërtimin e ashensorit brenda kafazit të shkallëve, pra brenda sipërfaqes së ndërtimit. Në këto kushte nga ana e inspektorëve tanë është mbajtur rezervali i konstatimit numër 5552, e cila detyron nxjerrjen e një vendimi me gjobë dhe të vendimit të prishjes të këtij ndërtimi sepse praktikisht ky ndërtim për sa kohë nuk është sipas projektit të miratuar është në shkelje. Pra është një ndërtim i paligjshëm. Ne kemi konstatuar në raste të tjera që ka pasur ashensorë që janë vendosur në fasada, por pa shkelur kushtet urbanistike apo pa cenuar pronën e askujt dhe në këtë rast prandaj është dhënë brenda kafazit të shkallëve sepse ka pasur probleme të kondicionit urbanistik. I është njoftuar subjektit nga ana jonë që të bëjë çmontim vullnetar deri në afatin 10 ditor nga nxjerrja e vendimit me gjobë dhe prishjes. Nëse nuk janë marrë masat që ta çmontojë vullnetarisht dhe ta kthejë territorin në gjendjen e mëparshme ne si IMT marrin vendimin për prishjen e kësaj strukture të paligjshme,” sqaroi Klajdi Meçi, drejtori i Kontrollit të Territorit./ Tv Klan
