Më shumë se 50 shqiptarë nga Shqipëria, Mali i Zi, Kosova dhe Maqedonia e Veriut humbën jetën nga COVID-19 në SHBA. Është kjo shifra që bëhet publike nga Ambasadorja jonë në këtë vend Floreta Luli Faber, e cila ndër të tjera shkruan se mes tyre gjenden edhe emrat e mjekut Raif Krasniqi 77 vjeç dhe Agron Vraja 51-vjeçari, anëtar i Këshillit Bashkiak në Lezhë.
Në një publikim në rrjetet sociale, Ambasadorja shprehet: “Pavarësisht se Covid-19 ka filluar të humbasë fuqinë vepruese për këtë sezon, për disa anëtarë të komunitetit shqiptaro-amerikan, të cilët Amerikën e kanë parë gjithmonë si tokën e lirisë dhe të ëndrrave, kujtimet e kësaj periudhe do të jenë të dhimbshme.
Është mbi 50 numri total i bashkëkombasve shqiptarë nga Shqipëria, Kosova, Mali i zi dhe Maqedonia e Veriut që kanë humbur betejën me virusin, duke kaluar edhe numrin total të vdekjeve në Shqipëri. Me këtë rast, i shprehim ngushëllimet e thella dhe të sinqerta të gjithë familjarëve dhe miqve të tyre. Përveç dhimbjes së madhe, në shumë raste ata nuk kanë mundur as t’i thonë lamtumirën e fundit të dashurve të zemrës.
Ndërmjet tyre, Agron Vraja (51), anëtari i Këshillit Bashkiak në Lezhë dhe Doktor Raif Krasniqi (77) kanë humbur jetën teksa ishin vizitorë në Nju Jork tek familjarët e tyre. Përveçse u larguan nga kjo jetë dhe askush nga të afërmit nuk mundi t’i qëndronte afër në momentet e vështira të sëmundjes, për shumë arsye, ata nuk mund të varroseshin në Nju Jork. Bashkë me to, edhe dy qytetarë shqiptaro-amerikanë, Ponari (47) dhe Vuktilaj (53) kishin lënë amanet – trupat e tyre duhet të ktheheshin në Shqipëri”.
Ndërsa njofton se pjesa më e madhe e qytetarëve me origjinë shqiptare që humbën jetën me Covid-19 do të prehen në tokën amerikane, Ambasadorja shkruan se është bërë i mundur riatdhesimi i trupave të 4 bashkëkombasve të sipërpërmendur, që tashmë do të prehen në atdhe. /Opinion.al
