Numri i të vdekurve nga tërmeti me magnitudë 7.8 që shkatërroi Turqinë dhe Sirinë të hënën e kaluar, më 6 shkurt, është rritur në 38,905 pas vlerësimeve të fundit të deklaruara.
Në Turqi janë 29,605 viktima të konfirmuara, ndërsa në Siri pothuajse 9,300.
Këtu, në veçanti, numri i viktimave “do të vazhdojë të rritet ndërsa ne kemi akses” në zonat e prekura, tha menaxheri rajonal i urgjencës i OBSH-së Rick Brennan, i cituar nga SkyNeës, gjatë një konference për shtyp në Damask.
Të shtunën më 11 shkurt një zyrtar i OKB-së tha se këto shifra mund të dyfishohen. “Mendoj se është vërtet e vështirë të vlerësohet me shumë saktësi sepse ne ende duhet të gërmojmë nën rrënoja, por jam i sigurt se (numri i të vdekurve) do të dyfishohet ose do të shkojë më tej”, tha përfaqësuesi i Kombeve të Bashkuara, Martin Griffiths.
Autoritetet turke arrestuan dje më shumë se 100 ndërtues në 10 provincat e prekura nga tërmeti i së hënës së kaluar. Këta janë persona të lidhur me disa prej ndërtesave të shembura, të dyshuar se kanë shkelur rregullat e ndërtimit në vend. Lajmi është bërë i ditur nga agjencia e lajmeve Anadolu.
Në të vërtetë, Ministria e Drejtësisë ka autorizuar rreth 150 prokurorë vendas për të ngritur “njësi hetimore për krimet e lidhura me tërmetet”. Prokurorët do të jenë në gjendje të nisin çështje penale kundër të gjithë “ndërtuesve dhe autorëve” të shembjes së ndërtesave që nuk kanë respektuar kodet ekzistuese, të prezantuara pas një fatkeqësie të ngjashme në 1999.
Një sipërmarrës i tillë është Mehmet Yasar Coskun, i cili është përgjegjës për ndërtimin e një godine luksoze 12-katëshe me 250 apartamente në provincën Hatay që u rrafshua nga tërmeti. Burri u arrestua të premten në aeroportin e Stambollit teksa po përpiqej të largohej nga vendi për në Mal të Zi, tha Anadolu. Prokurorët e Stambollit urdhëruan arrestimin e tij pasi zbuluan planet e tij të fluturimit./Opinion.al
