Më shumë kontrabandë në Rinas dhe Durrës – “Objektivi ynë referuar gjetjeve është 75 për muaj, apo mbi 1800 gjetje për dy vjet”, njofton “Crown Agents”. Kjo mbështetet në një përllogaritje paraprake se 20% e kontrolleve duhet të rezultojnë në gjetje ose të mashtrimit me të ardhurat ose shpërdorimin. Sipas “Crown”, “Në të vërtetë, e kemi tejkaluar këtë objektiv me 136% dhe në total kemi kryer 4263 gjetje”
“Crown Agents” deklaron se ka rritur të ardhurat e doganave me rreth 32 milionë euro, vetëm nga operacionet që ka kryer në terren. Në një deklaratë të bërë dje, me rastin e përfundimit të kontratës dyvjeçare, kompania britanike njofton se “të gjithë objektivat operativë, jo vetëm që u përmbushën, por edhe u tejkaluan ndjeshëm, veçanërisht numri i rasteve të zbuluara të mashtrimit dhe shpërdorimit, i cili ishte mbi 4,500”.
“Si rezultat i rasteve të zbuluara prej nesh gjatë kësaj periudhe, është bërë i mundur identifikimi dhe mbledhja e një shume më të madhe të ardhurash se sa vlera e vetë kontratës.
Duke marrë parasysh këtë, nuk ka pasur kosto efektive për taksapaguesit e rregullt shqiptarë. Të vetmit që kanë paguar janë ata individë të cilët po përpiqeshin të shmangnin detyrimet e tyre”, theksohet në njoftimin e “Crown Agents”. Kompania deklaron se i ka ofruar Administratës Doganore dhe Qeverisë Shqiptare asistencë në shumë fusha, përfshirë: masat për parandalimin dhe zbulimin e korrupsionit, standardet profesionale, burimet njerëzore, analizën e riskut, kontrollet e akcizës. “Një pjesë e madhe e operacioneve doganore nuk kanë të bëjnë vetëm me të ardhurat, por edhe me ndikimin që zbulueshmëria sjell në respektimin në tërësi të ligjit dhe gjithashtu në faktin që kjo mund të parandalojë ose së paku të ndërpresë veprimtari mashtruese në të ardhmen”, nënvizohet në këtë deklaratë. “Bazuar në gjetjet tona vlerësojmë se kemi identifikuar përafërsisht 32 milionë euro të ardhura dhe gjoba. Kjo shifër është pothuajse katër herë sa vlera e kontratës tonë”, thotë deklarata. Identifikimi i të ardhurave dhe shkeljeve, sipas “Crown Agents”, jo domosdoshmërisht përkthehet në të ardhura. “Stafi i Degëve Doganore mund të mos i merrte parasysh këshillat tona duke mos aplikuar masat e rekomanduara, disa importues mund të apelonin kundër vendimeve, disa mund të padisnin doganat në gjykatë për të kthyer mbrapsht vendimet, ndërsa disa të tjerë thjesht mund të shpallnin falimentin ose të zhdukeshin me qëllim që të shmangnin shlyerjes së detyrimeve. Të gjitha këto çështje janë adresuar gjatë kohëzgjatjes së programit, duke sjellë në një përmirësim të dukshëm të nivelit të të ardhurave”, deklaron “Crown Agents”. “Ky total (32 milionë euro) lidhet vetëm me të ardhurat e identifikuara drejtpërdrejt nga grupet tona operative. Nuk përfshin impaktin më të gjerë që ka pasur parandalimi i rrjeteve informale të furnizimit, shkatërrimi i rrjeteve të kontrabandës dhe i zyrtarëve të korruptuar, si edhe hetimet e mëtejshme të cilat u ndërmorën si rezultat i gjetjeve tona fillestare”, deklaron “Crown Agents”.
Ndër rastet që nuk lidhen direkt me të ardhurat, sipas “Crown Agents”, përfshihen shkeljet e të drejtave të pronësisë intelektuale, mallrave të ndaluara si droga, lëvizja e parave cash duke tejkaluar limitin e lejuar, medikamente të palicencuara dhe të falsifikuara, dhe mbi të gjitha mallra të pasigurta për konsumatorin. Po ashtu, përfshihen lodrat për fëmijë me fisha elektrike të pasigurta, produkte për higjienën e femrave me origjinë të dyshimtë, verë dhe raki të prodhuar në vend (pa pullë fiskale) apo edhe fishekzjarrë të sjella nga importues të paautorizuar.
Të gjitha këto produkte përbëjnë rrezik të vërtetë dhe të menjëhershëm për konsumatorët. “Crown Agents” rendit si sukses edhe bllokimin e makinave që qarkullonin me targa të huaja, që përbënin rrezik edhe për sigurinë, përveç mospagimit të taksave. Sipas “Crown Agents”, numri i zbulimeve të bëra ishte 136% më i lartë se objektivat e përcaktuar nga qeveria, pavarësisht përpjekjeve të përsëritura të subjekteve tregtare e të tjerëve për t’i penguar të punonim në mënyrën e duhur. “Rezervohemi të bëjmë komente të tjera për momentin duke qenë se po merremi përgatitjen e të gjitha raporteve të nevojshme të cilat do t’i dorëzohen qeverisë shqiptare”, deklaron “Crown Agents”.
