40-vjeçari Adem Spahiu ra pre e një grabitje dje në Tiranë në mes të ditës. Ai po depozitonte paratë e punës në bankë kur dy persona me motor me skafandera i morën qesen me para nga dora sapo doli nga makina. Grabitja ndodhi rreth orës 15:00 të së mërkurës në rrugën “Medar Shtylla” tek Komuna e Parisit. Personi që u grabit punon si menaxher i një kompanie private dhe po depozitonte 25 mijë euro në bankë.
Gjatë dëshmisë së tij në polici, Spahiu tha se 2 personat motor i ka parë pas makinës se tij kur ka lëvizur në qytet për të shkuar tek banka, por nuk e ka ditur se po ndiqnin atë. Sapo ka parkuar pranë bankës për të depozituar 25 mije euro që ishin xhiroja ditore e firmës. Njëri prej personave që ndodhej në motor e ka goditur me shpullë dhe ja ka marrë me forcë qesen me para. Ndërkohë autori tjetër qendronte në motor pas tij. Po ashtu 40-vjeçari tha se nuk kishte arritur të shquante fytyrat e personave që e grabitën, pasi ata kishin vendosur skafandër dhe doreza. Deri më tani policia nuk ka asnjë të dyshuar për ngjarjen në fjalë, ndërkohë që vijojnë hetimet.
