Kreu i Partisë Demokratike, Sali Berisha, ka komentuar ditën e sotme vendimin e gjykatës për lirimin nga qelia të ish-deputetit të PS, Alqi Bllako.
Gjatë një bashkëbisedimi me qytetarët në Memaliaj, Berisha tha se Bllako u lirua pasi i “kërcëlliti dhëmbët Erion Veliajt dhe Edi Ramës”. Sipas tij Bllako ka kërcënuar duke thënë më lironi ose do flas.
“Dje liruan deputetin pasi ia kërcëlliti dhëmbët Erion Velisë dhe Edi Ramës. ‘Më lironi ose do flas’. E nxorrën në shtëpi Bllakon. Bllako, i cili me paret tuaja i kishte lidhur një rrogë 10-12 milionë rrogë mujore të atit sikur të ishte ai shef ekzekutivi i ndonjë korporate të madhe. Pra a do të tolerojmë ne në këtë mënyrë? Jo nuk mund ta tolerojmë”, theksoi kreu i selisë blu.
Kryedemokrati më tej tha: “Sot edhe djegësi i Elbasanit që u ndërtua me 12 milionë nga 24 që u disbursuan se 12 u shpërndanë me Edi Ramën dhe ministrat dhe ai sot është jashtë funksionit. U instalua një hedhurinë. U gjet diku dhe u ndërtua në Elbasan. I Tiranës nuk ekziston, i Fierit nuk ekziston. Ekzistojnë vetëm dhjetëra milionë euro të vendosura në konto bankare për të tu fshehur”.
