Me dy vite burg është dënuar një ish-efektivë policie nga Shqipëria, pasi u arrestua nga policia britanike në Skoci gjatë një operacioni kundër fermave të kanabisit.
Igli Duka, 24 vjeç, u arrestua pasi policia bastisi një ish-ndërtesë garazhi në Houston Industrial Estate, në Livingston, vitin e kaluar.
Në dëshminë e tij, ai pretendoi se një gangster famëkeq që ai kishte arrestuar më parë në vendin e tij e kishte shantazhuar atë për të qenë “kopshtar” në fermën e kanabisit.
Duka tha se gangsteri kishte kërcënuar familjen e tij pasi kishte dalë nga paraburgimi i policisë, shkruan BBC.
Edhe avokati i Dukës, Andy Aitken, ka mbështetur tezën e klientit të tij dhe pretendoi se anëtari i “rangut të lartë” të bandës kishte dhënë ryshfet për të dalë nga paraburgimi.
Avokati i tha gjykatës së Sherifit të Livingston se Duka ishte arratisur në Britani të Madhe nga frika për sigurinë e tij dhe kishte gjetur punë në një kantier ndërtimi në Birmingham.
Familja e tij iku në Greqi, por babai i tij u detyrua të kthehej në Shqipëri për shkak të problemeve shëndetësore. Por ai pretendoi se banda u kap me të atin dhe e detyruan të tregonte vendndodhjen e Dukës.
Dukës iu kërkua që të zgjidhte midis dy mundësive: ose të kujdesej për fermën e kanabisit ose të përballej me pasoja të rënda për familjen e tij në Shqipëri, tha zoti Aitken në gjykatë.
Duka, i burgosur në HMP Addiewell, u deklarua fajtor për prodhimin e drogës së klasit B.
Ai u dënua me dy vjet burg që datojnë më 22 shtator 2023, kur ai u ndalua për herë të parë në paraburgim.
