Policia ka zhvilluar dy operacione të ndryshme, në Rrëshen, dhe ka arritur të parandalojë dy ngjarje kriminale.
Në një njoftim për mediat, uniformat blu bëjnë me dije se në kuadër të operacionit “Repsi”, kapën në flagrancë me armë zjarri me vete, dy vëllezër që po udhëtonin me makinë, në hyrje të Rrugës së Kombit. Atyre iu është sekuestruar 1 kallashnikov me fishekë në fole dhe gati për qitje, por edhe 1 pushkë.
“Në kuadër të operacionit “Repsi”, bazuar në informacionet e siguruara se 2 shtetas qarkullonin me armë dhe dyshohet se do të kryenin një ngjarje kriminale kundër personit, shërbimet e Policisë kanë ndërhyrë dhe kanë kapur në flagrancë, në hyrje të Rrugës së Kombit, shtetasit B. Gj. dhe P. Gj. Gjatë kontrollit fizik, këtyre shtetasve iu gjetën 1 armë zjarri kallashnikov me fishekë në fole gati për qitje dhe 1 armë zjarri pushkë. Nga specialistët për Hetimin e Krimeve të Komisariatit të Policisë Mirditë u arrestuan në flagrancë shtetasit: B. Gj., 39 vjeç (i dënuar më parë për veprën penale “Dhuna në familje”) dhe P. Gj., 29 vjeç (vëllezër), të dy banues në fshatin Zall Xhuxhë, Mirditë.”
Më pas, në kuadër të operacionit “Fani”, u vu në pranga 1 shtetas që u kap me armë zjarri kallashnikov, po me fishekë në fole. Bazuar në informacionet e siguruara N.K., mund të kryente një ngjarje kriminale kundër personit.
“Në kuadër të operacionit Fani”, bazuar në informacionet e siguruara se një shtetas që posedonte një armë zjarri kallashnikov, mund të kryente një ngjarje kriminale kundër personit, shërbimet e Policisë kanë ndërhyrë dhe kanë ndaluar shtetasin N. K., si dhe kanë sekuestruar armën e zjarrit kallashnikov që ai posedonte, bashkë me 11 krehra dhe municion luftarak.”
Po ashtu në një operacion të ngjashëm një të moshuari në Fushëkuqe të Kurbinit iu sekuestrua 1 armë zjarri pushkë.
“Në Kurbin, bazuar në informacionet e siguruara nga inteligjenca policore se shtetasi T. Gj. mbante armë zjarri në banesë, shërbimet e Policisë kanë ushtruar kontroll në banesën e tij, ku kanë gjetur 1 armë zjarri pushkë dhe municion luftarak, të cilat u sekuestruan në cilësinë e provës materiale.”
