Një turist amerikan në Firence u përball me një gjobë prej 500 euro të hënën kur filloi të ngiste Ferrarin e tij të kuq në ‘Piazza della Signoria’, një shesh piktoresk për këmbësorët në qendrën historike të qytetit të Firences.
Megjithatë, përveç gjobës, autoritetet e policisë lokale të qytetit arrestuan turistin pasi e kishin parë makinën duke kryer një manovër të kundraligjshme në “Via dei Gondi”.
“Kontrollet treguan se shoferi 43-vjeçar kishte një patentë amerikane që nuk përputhej me konventat ndërkombëtare”, thuhet në një deklaratë të qytetit të Firences.
Siç theksohet: “Është bërë denoncim për parkim në rrugë për këmbësorë, drejtim në kah të kundërt dhe patentë që nuk respektonte ligjet ndërkombëtare. Gjoba ishte gjithsej 470 euro, të cilën e ka paguar direkt në organet kompetente”.
Kjo nuk është hera e parë në muajt e fundit që turistët hasin telashe në vendet historike të Italisë.
Në janar, një turist nga Kalifornia u gjobit me 500 euro për drejtimin e mjetit mbi Ponte Vecchio, një urë e lashtë këmbësore që kalon lumin Arno në Firence.
Në mënyrë të ngjashme, majin e kaluar, një burrë saudit u arrestua duke u përpjekur të largohej nga Italia pasi ai drejtoi një makinë sportive Maserati të marrë me qira në “Piazza di Spagna” dhe u largua nga vendi i ngjarjes pasi automjeti u bllokua në mes të rrugës. Ai u akuzua për shkatërrimin e një monumenti kulture./Opinion.al
