Një djalë i ri, vetëm 22 vjeç u nxorr sot i pajetë nga deti, në bregdetin e Gjirit të Lalzit në Durrës. Qytetarët u shprehën të shqetësuar se fatkeqësisht askush nuk u gjend për ti shkuar në ndihmë ndërsa policia dhe ambulanca mbërritën me vonesë edhe pasi trupi i pajetë doli në breg. Pas kësaj ngjarje të rëndë ka reaguar Federata Shqiptare “Vrojtuesit e Plazhit dhe Shpetimit ne Uje”.
Në një njoftim për mediat ajo shpreh edhe një herë shqetësimin për mungesën e rojeve bregdetare në plazhe.
Deklarata e plotë:
Duke marrë shkas nga raportimet më të fundit mediatike, duket se sezoni turistik 2018 nuk ka nisur me këmbën e mbarë. Federata Shqiptare “Vrojtuesit e Plazhit dhe Shpëtimit në Uje” u bën thirrje të gjitha subjekteve private që marrin në përdorim një stacion plazhi të zbatojnë kriteret për sigurinë në stacionet e plazhit, të punësojnë vrojtues plazhi me qëllim parandalimin e rasteve fatale. Gjithashtu, u bëjmë thirrje të gjitha institucioneve shtetërore të ngarkuara sipas ligjit, te monitorojne ushtrimin e aktivitetit ne stacionin e plazhit, me qellim zbatimin e normave ligjore te percaktuara per kete veprimtari.
Njoftimi i policisë:
Viktima është shtetasi me inicialet E.S., 22 vjeç, nga Tirana. Ngjarja ka ndodhur rreth orës 12:15. Trupi i pajetë është nxjerrë në breg nga pushuesit. Grupi hetimor po punon për zbardhjen e plotë të shkaqeve të ngjarjes.
