“Brenda TikTok-ut të Kinës nuk sheh huliganizëm, perversitet, dhunë, bullizëm, krim, thika rrezole, ndërsa në TikTok jashtë Kinës vetëm llum dhe të poshtër. Pse na duhet kjo?”
Kjo deklaratë e kryeministrit Rama në dhjetor të vitit të kaluar për të mbyllur platformën e TiKTok-ut në Shqipëri ka risjellë sërish këtë çështje në vëmendje të mediave ndërkombëtare.
Agjencia e lajmeve “Reuters”i ka kushtuar një reportazh të gjatë këtij vendimi, duke sjellë opinione të ndryshme të qytetarëve.
Një pjesë e tyre e shohin këtë masë të kryeminstrit Rama si një mundësi për të shmangur sadopak fenomenin e dhunës të promovuar nga ky aplikacion, krysisht në gjirin e të rinjve.
“Të gjitha qeveritë që kanë marrë vendime të tilla u janë referuar krimeve që po ndodhin. Këta fëmijë shikojnë vetëm gjëra negative në TikTok. Mendoj se është një vendim i mirë për momentin. Le të mbyllet për momentin, të shohim se si gjërat zhvillohet pas ndalimit, atëherë është në dorën e të gjitha qeverive ta mbajnë atë të mbyllur ose jo. Unë personalisht jam në favor të mbylljes së TikTok“.
Ka nga ata që thonë se masa e vendosur nga qeveria shqiptare penalizon një pjesë të bizneseve që aktivitetin e tyre e ushtrojnë online përmes këtij aplikacioni, siç është edhe rasti i këtij të riu.
“Ndalimi i TikTok do të ketë një ndikim të madh tek unë sepse unë shkoj drejtpërdrejt në orën 23:00 dhe them: ‘Përshëndetje, si ishte dita jote? Po filloj të bëj dërgesa tani, kush dëshiron të porosisë ndonjë cigare, alkool, birrë, patatina në Tiranë do t’jua sjell unë.’ Më vjen keq për këtë sepse kam investuar shumë në këtë mënyrë marketingu, me gjithë shpirt, por, siç thashë, ka shumë shembuj negativë në TikTok, (dhe) ndoshta kryeministri (Edi Rama). duhet të eliminojë ato gjëra”.
Të tjera biznese që sigurojnë marketingun përmes këtij alikacioni kanë parë që tani të tjera rrugë si alternativë.
Kreu i qeverisë e shpalli ndalimin për një vit të aplikacionit të TikTok-ut më 21 dhjetor pasi një 14-vjeçar u godit me thikë nga një nxënës tjetër, ç’ka shkaktoi edhe protesta lidhur me ngajrjen e rëndë.
Nuk mungojnë as skeptikët singa shoqëria civile ashtu edhe nga radhët e politikës. Madje këta të fundit e shohin si pjesë të goditjes së kryeministrit ndaj kundërshtarëve në opozitë.
Aplikacioni TikTok është ndaluar plotësisht dhe pjesërisht në të paktën 20 vende, mes të cilave Franca, Gjermania e Belgjika për shkak të shqetësimeve lidhur me video të papërshtatshme ose çështje sigurie.
Vetë TikTok pas vendimit për mbylljen e platformës në Shqipëri kërkoi qartësi urgjente nga qeveria shqiptare, duke sqaruar se viktima nuk kishte llogari në këtë aplikacion dhe se raportet e shumta kanë konfirmuar që videot që çuan në vrasjen e 14-vjeçarit në vendin tonë postoheshin në një platformë tjetër dhe jo në TikTok./ TV Klan
