Ministri i Mjedisit dhe i Turizmit Blendi Klosi ka qenë sot në zonën e guroreve të Krujës, për të inspektuar mbylljen e tyre. Ministri u kundërshtua nga pronarët e bizneseve, të cilët pretendojnë se kanë leje të rregullt për të ushtruar aktivitetin e tyre. Klosi u kundërpërgjigj, duke thënë se në atë zonë nuk do të ketë më gurore pasi është shpallur zonë e mbrojtur dhe ata duhet të spostohen në vende të tjera.
Debati mes Klosit dhe pronarit të gurores:
Blendi Klosi: Ne kemi thënë që të spostoheni
Pronari i gurores: Më ke dhënë lejen në 2016 , pse ma dhe, të mos ma jepje.
Blendi Klosi: Duhet të spostoheni. Kjo do të mbarojë një ditë sepse është shpallur zonë e mbrojtur.
Pronari i gurores: Na jepni afat.
Blendi Klosi: Është zonë e mbrojtur, turistike. Nuk të themi të lësh kalamajt pa bukë e të ndërpresësh biznesin.
Pronari i gurores: Çfarë duhet të bëj?
Blendi Klosi: Të spostohesh.
Pronari i gurores: Ka një vit që e kam çuar në ministrinë e Energjetikës për tek zona tjetër. Nuk e kam marrë lejen.
Blendi Klosi: Do shkojmë nesër dhe të ndihmoj që ta marrim lejen. Kam qenë 8 vjet deputet këtu, një pjesë tuajën i kam miq, i njoh. Por ju duhet ta kuptoni që do mbyllet. Nuk do ikni ju e do vijnë të tjerë, thjesht s’do ketë më./Opinion.al
