TIRANë- Ka përfunduar rreth orës 15:00 protesta e Partisë Demokratike e cila nisi rreth orës 11:00 të ditës së sotme kur përkujtohet dita e Rinisë, 25 vjetori i rrëzimit të komunizmit. Në protestën e sotme ku morën pjesë mijëra qyetarë (numri i saktë ende nuk dihet). Protesta u shoqërua edhe me disa incidente.
Qytetarët u mblodhën në Sheshin Skënderbej dhe iu drejtuan në formë marshimi Kryeministrisë pak pas orës 11:00. Në podiumin e ngritur para Kryeministrisë folën përreth dy orë drejtues të lartë të kësaj partie, lideri Basha por edhe qytetarë e familjarë të martirëve të demokracisë. Kryeministri Sali Berisha qendroi në mes të turmës dhe nuk u ngjit në podium.
Protesta u shoqërua me disa incidente të vogla tek Kryeministria. Në fillim u vodhën vezë dhe mjete piroteknike apo bojë në shkallët dhe muret e Kryeministrisë. Raportohen edhe dëmtime në xhama, tek selia e Qeverisë.
Pas fjalës së Bashës, turma iu drejtua Ministrisë së Brendshme. Një grup protestuesit arritën të çajnë duke ushtruar forcë rrethimin me llamarina dhe hynë brenda korposit të Ministrive.
Ky ka qenë edhe kulmi i protestës ku iu vu flaka bunkerit, një instalacion historiko-kulturor që po ndërtohej aty. Ish-të përndjekurit e kundërshtonin prej kohësh këtë bunker dhe sot u kishte ardhur dita për të hipur mbi të dhe për ti vënë flakën.
Sakaq disa të tjerë hodhën gurë dhe mjete të tjera të forta në drejtim të Ministrisë së Brendshme dhe asaj të Transporteve. Aty pati disa dëme materiale, të cilat nuk dihen për momentin se të çfarë përmasave janë. Kamerat e TV pasqyruan ‘live’ xhama të thyer.
Protestuesit qëndruan për rreth dy orë tek Ministria e Brendshme dhe përreth bunkerit. Policia qendroi në distancë pa ndërhyrë në shpërndarjen e protestuesve që digjnin bunkerin apo e qëllonin atë me mjete të forta.
Në përfundim u arrit të shkatërrohej bunkeri, por jo të shembej plotësisht.
Protestuesit më pas iu drejtuan selisë së PD, aty ku pati një fjalim të shkurtër falenderues, Lulzim Basha. Ndërsa një grupim më i vogël iu drejtua bustit të Azem Hajdarit në shenjë nderimi.
Nuk ka të dhëna ende për persona të shoqëruar në polici, por mësohet se Policia e Shtetit ka fotografuar gjithë personat që dhunuan bunkerin dhe hodhën sende të forta apo lëndë pirotenkine drejt institucioneve.
