Pas rreth katër orësh, opozita e bashkuar mbylli protestën ku nuk munguan incidentet mes policisë dhe mbështetësve të opozitës. Përplasjet ndodhën pas tre rrethimesh simbolike të kryeministrisë dhe zhvendosjes së protestuesve te Parlamenti. Në këtë moment disa protestues, tentuan të çajnë kordonin e policisë, ndërsa kjo e fundit u përgjigj me gaz lotsjellës si dhe duke futur në veprim botet e ujit. Raportohet për disa të lënduar si nga ana e protestuesve, edhe nga ana e efektivëve të policisë.
Kjo përballje zgjati rreth një orë dhe më pas Lulzim Basha drejtoi protestuesit për në selinë e Partisë Demokratike ku mbajti edhe një fjalim. Mesazhi ishte i qartë dhe iu drejtohej ndërkombëtarëve, të cilët kanë kritikuar aksionin e opozitës.
“Dua t’i dërgoj një mesazh miqve perëndimorë, që na kanë mbështetur në 29 vjet: Nuk ka stabilitet pa demokraci, nuk ka stabilitet pa drejtësi. Dëgjojini më pak autokratët e korruptuar. Mos dëgjoni autokratin e korruptuar Edi Rama, dëgjoni zërin e njerëzve”, tha Basha.
Nga ajo që la të kuptohej kryetari i Partisë Demokratike, aksioni i opozitës do të vazhdojë në çdo qytet të Shqipërisë, pa dhënë një datë konkrete se kur do të jetë protesta e radhës.
“Ka pesë javë që nuk gjen vrimë miu të fshihet, sa herë shqiptarët bashkohen. Ta bëjmë bashkimin tonë dhe protestën tonë, të përditshme dhe të përnatshme. Në Europë shkohet vetëm me zgjedhje të lira, vetëm duke i dhënë fund padrejtësive. Kjo është rruga jonë, që do të çlirojë ekonominë. Ditë për ditë e natë për natë, në aksion qytetar, në protestë, në qëndresë, në përballje, mos e ktheni faqen tjetër kur ju godasin horrat e shtetit, por goditini mbrapsht. Le të vlojë çdo çast me tik-takun e zemrës së çdo shqiptari patriot”, ka thënë Lulzim Basha.
Ai e quajti këtë ditë si “pas komunizmit, dita e dytë e zgjimit kombëtar”. Ai gjithashtu u shpreh se qeveria nëpërmjet Policisë së Shtetit, ushtroi dhunë për t’i trembur protestuesit.
“Sot më në panik se kurrë, kufoma politike e Edi Ramës dhe klikës politike, përshkallëzoi dhunën ndaj protestuesve, për t’i shpërndarë, për t’i trembur, për t’i larguar nga rruga e protestës. Por përgjigjen e mori nga populli. Duart e gjata të krimit, që për llogari të oligarkëve dhe kriminelëve dhunojnë nënat dhe motrat tona, do të japin përgjegjësitë para ligjit, zotohem para jush dhe Shqipërisë”, u shpreh Lulzim Basha nga selia blu./Opinion.al
