Kosova ka vendosur mbylljen e të gjithë kufijve të saj, përfshirë edhe me Shqipërinë për një periudhë 14 ditore, në kuadër të masave antikoronavirus, pas konfirmimit të dy rasteve të para mbrëmjen e së premtes. Ky njoftim është bërë i ditur nga Policia Kufitare e Shqipërisë, e cila thotë se pas këtij orari do lejohen të hyjnë në Kosovë, shtetasit kosovarë që janë në Shqipëri dhe duan të kthehen në Kosovë, si dhe do lejohen të hyjnë në Shqipëri, shtetasit shqiptarë që janë në Kosovë dhe duan të kthehen në Shqipëri. Gjithashtu përjashtohen nga ky kufizim, ambulancat, lëvizja e mallrave dhe makinat qeveritare
“Policia Kufitare njofton të gjithë qytetarët se pikat e kalimit kufitar me Kosovën do të mbyllen për 14 ditë, për arsye të parandalimit të COVID-19.
Duke filluar prej orës 10:00 të datës 14.03.2020, nuk do lejohet asnjë automjet dhe asnjë shtetas të hyjnë në Kosovë dhe anasjelltas. Do lejohen të hyjnë në Kosovë, shtetasit kosovarë që janë në Shqipëri dhe duan të kthehen në Kosovë, si dhe do lejohen të hyjnë në Shqipëri, shtetasit shqiptarë që janë në Kosovë dhe duan të kthehen në Shqipëri. Do lejohen ambulancat, lëvizja e mallrave dhe makinave qeveritare. Ky vendim i palës kosovare është marrë për të gjithë kufirin e Kosovës, jo vetëm për kufirin me Shqipërinë”, thuhet në njoftim.
Policia Kufitare ka theksuar se qytetarët që janë duke lëvizur në drejtim të Morinës, të kthehen mbrapa, pasi nuk do lejohen të kalojnë./ Opinion.al
